٣٧١٤٥۔۔۔ حسن نبی کریم (صلی اللہ علیہ وآلہ وسلم) کے ایک صحابی (ابن عوف کہتے ہیں ان کا نام سفینہ ہے) سے روایت نقل کرتے ہیں کہ رسول اللہ (صلی اللہ علیہ وآلہ وسلم) ایک سفر میں تھے سفینہ (رض) کی سواری پر نبی کریم (صلی اللہ علیہ وآلہ وسلم) کا زادراہ رکھا ہوا تھا اتنے میں حضرت صفوان بن معطل (رض) آئے اور کہا میں بھوکا ہوں سفینہ (رض) نے کہا : میں تمہیں کچھ نہیں دوں گا یہاں تک کہ نبی کریم (صلی اللہ علیہ وآلہ وسلم) مجھے حکم نہ دے دیں اور جہاں لوگ پڑاؤ کریں گے تم بھی ان کے ساتھ مل کر کھا لینا صفوان (رض) نے تلوار کی طرف اشارہ کیا اور اونٹنی کی کونچ کاٹ ڈالی اتنے میں صحابہ (رض) نے رک جاؤ رک جاؤ کی آوازسنی صحابہ (رض) فورا رک گئے اور نبی کریم (صلی اللہ علیہ وآلہ وسلم) جب تشریف لائے اور دیکھا تو فرمایا : نکل جا۔ جب کہ صحابہ (رض) کو کوچ کرنے کا حکم دیا صفوان (رض) نے قافلہ کے پیچھے رہنا شروع کردیا حتیٰ کہ ایک جگہ صحابی نے پڑاؤ ڈالا صفوان (رض) صحابہ (رض) کے کجادوں کا چکر لگانے لگے اور کہتے جاتے۔ رسول اللہ (صلی اللہ علیہ وآلہ وسلم) نے مجھے کہاں نکالا ہے۔ کیا دوزخ کی طرف نکالا ہے ؟ صحابہ (رض) نے آکر رسول اللہ (صلی اللہ علیہ وآلہ وسلم) کو خبر کی کہ یا رسول اللہ ! آج پوری رات صفوان بن معطل ہمارے کجادوں کا چکر لگاتا رہا اور کہتا ہے رسول اللہ (صلی اللہ علیہ وآلہ وسلم) نے مجھے کہاں نکالا ہے ؟ کیا دوزخ کی طرف مجھے نکالا ہے ؟ رسول اللہ (صلی اللہ علیہ وآلہ وسلم) نے فرمایا : صفوان بن معطل زبان کا گندا ہے لیکن دل کا پاک ہے۔ (رواہ ابویعلی وابن عساکر)