٣٧١٦٣۔۔۔ حضرت عبداللہ بن جعفر (رض) کہتے ہیں : مجھے اچھی طرح یاد ہے کہ جب نبی کریم (صلی اللہ علیہ وآلہ وسلم) میرے والد کی وفات کی خبر دیتے میری والدہ کے پاس تشریف لائے میں آپ کی طرف دیکھے جارہا تھا اور آپ میرے سر پر اور میرے بھائی کے سر پر دست شفقت پھیرے جارہے تھے جب کہ آنکھوں سے آنسو بہہ رہے تھے حتیٰ کہ آپ کی داڑھی سے آنسو ٹپکنے لگے۔ پھر آپ نے فرمایا : یا اللہ ! بلاشبہ جعفر اچھے ثواب کی طرف پہنچ گیا ہے اس کی اولاد میں اچھے لوگ پیدا فرما۔ پھر فرمایا : اے اسماء ایک میں تمہیں خوشخبری نہ دوں ؟ وہ بولیں ! جی ہاں یارسول اللہ ! ضرور فرمایا : اللہ تعالیٰ نے جعفر کو دو پر عطا کیے ہیں جن سے وہ جنت میں اڑ رہے ہیں۔ اسماء (رض) بولیں : یارسول اللہ ! میرے ماں باپ آپ پر قربان جائیں ، آپ لوگوں کو بھی بتادیں۔ رسول اللہ (صلی اللہ علیہ وآلہ وسلم) اٹھ کھڑے ہوئے مجھے بھی ہاتھ میں پکڑلیا اور میرے سر پر ہاتھ پھیرتے رہے پھر آپ منبر پر تشریف لے گئے اور مجھے نچلے زینے پر بیٹھا دیا غم وحزن کے آثار آپ پر نمایاں دکھائی دیتے تھے، آپ نے فرمایا ، آدمی کے بھائی اور چچا زاد بھائی بہت سارے ہوتے ہیں الایہ کہ جعفر شہید ہوچکے ہیں اللہ تعالیٰ نے جنت میں انھیں دو پر عطا کیے ہیں جن سے وہ اڑ رہے ہیں۔ پھر رسول اللہ (صلی اللہ علیہ وآلہ وسلم) منبر سے نیچے تشریف لے آئے اور اپنے گھر میں داخل ہوگئے مجھے بھی اپنے ساتھ لے گئے آپ نے کھانا تیار کرنے کا حکم دیا چنانچہ میرے گھر والوں کیلئے کھانا تیار کیا گیا، آپ نے میرے بھائی کو پیغام بھیج کر منگوالیا ہم نے آپ کے پاس کھانا کھایا بخدا کیا خوب پاکیزہ اور بابرکت کھانا تھا پھر آپ کی خادمہ سلمی نے جو لیے انھیں پیسا اور صاف کیا پھر انھیں گوند کر پکائے اور ان پر کالی ڈالی میں نے اور میرے بھائی نے آپ کے ساتھ ملکر کھانا کھایا ہم تین دن تک آپ کے گھر میں رہے آپ اپنی جس بیوی کے پاس ہوتے ہم بھی آپ کے ساتھ ہوتے پھر ہم اپنے گھر واپس لوٹ آئے پھر رسول اللہ (صلی اللہ علیہ وآلہ وسلم) تشریف لائے جب کہ میں اپنے بھائی کی ایک بکری کا بھاؤ تاؤ لگارہا تھا آپ نے فرمایا : یا اللہ اس کے سودے میں برکت عطا فرما۔ چنانچہ میں نے جو چیز بھی فروخت کی یا خریدی وہ میرے لیے بابرکت ثابت ہوئی (رواہ ابن عساکر)