٣٧٤١٧۔۔۔ مصعب بن عبداللہ کی روایت ہے کہ جب نبی کریم (صلی اللہ علیہ وآلہ وسلم) نے حضرت عکرمہ بن ابی جہل (رض) کو دیکھا تو آپ ان کی طرف کھڑے ہوئے اور انھیں گلے لگالیا اور فرمایا : سوار ہو کر ہجرت کرنے والے کو ہم خوش آمدید کہتے ہیں مصعب کہتے ہیں : بعض لوگوں کا خیال ہے کہ رسول اللہ (صلی اللہ علیہ وآلہ وسلم) عکرمہ (رض) کی طرف کھڑے ہونے اور ان پر خوش ہونے کی وجہ یہ تھی کہ آپ نے خواب دیکھا گویا آپ جنت میں داخل ہوگئے ہیں اور آپ نے جنت میں کھجوروں کا خوشہ لٹکا دیکھا جو آپ کے دل کو بہت بھایا آپ نے پوچھا : یہ کس کا ہے ؟ جواب ملا : یہ ابوجہل کا ہے آپ پر یہ بہت ہی گراں گزرا اور فرمایا : ابوجہل کا جنت سے کیا تعلق اللہ کی قسم ابوجہل جنت میں داخل نہیں ہوگا چنانچہ جب آپ نے عکرمہ (رض) کو بحالت مسلمان دیکھا تو خواب میں دکھائی دہنے والے خواشے کی تعبیر عکرمہ بن ابی جہل (رض) سے لی۔ عکرمہ (رض) آپ کی خدمت میں اس وقت حاضر ہوئے جب آپ فتح مکہ کے بعد مدینہ واپس لوٹ آئے تھے عکرمہ (رض) جب بھی انصار کی مجلسوں کے پاس سے گزرتے انصار کہتے یہ ابوجہل کے بیٹے ہیں ابوجہل کو گالیاں دیتے عکرمہ (رض) نے رسول اللہ (صلی اللہ علیہ وآلہ وسلم) سے اس کی شکایت کی رسول اللہ (صلی اللہ علیہ وآلہ وسلم) نے فرمایا : مردوں کو گالیاں دے کر زندوں کو اذیت مت پہنچاؤ۔ (رواہ الزبیروابن عساکر)
فائدہ :۔۔۔ ایک حدیث میں آپ نے فرمایا :” لاتسبوا الاموات “ مرد کو گالیاں مت دو ۔ ایک اور حدیث ہے ” لاتسبو الاموات فانھم افضوالی ماقدموا “ مردوں کو گالیاں مت دو گالیاں مت دو چونکہ وہ اپنے اعمال کی جزا یا سزا بھگتنے آگے پہنچ چکے ہیں۔ انہی دلائل کی روشنی میں علماء نے یزید بن معاویہ کو برا بھلا اور سب وشتم کرنے ست منع فرمایا ہے۔ لہٰذا یزید پر لعن طعن کرنے والوں کو سوچ لینا چاہیے کہ نبی کریم (صلی اللہ علیہ وآلہ وسلم) کی کیا تعلیمات ہیں۔