٣٧٤٢٣۔۔۔ عامر بن سعد ، عکرمہ بن ابوجہل (رض) سے روایت نقل کرتے ہیں کہ رسول اللہ (صلی اللہ علیہ وآلہ وسلم) نے جب عکرمہ (رض) کو دیکھا فرمایا : راکب مہاجر کو ہم مرحبا کہتے ہیں۔ پھر عکرمہ (رض) نے عرض کیا : یا نبی اللہ ! کیا کہوں ؟ فرمایا : تم گواہی دو کہ اللہ کے سوا کوئی معبود نہیں اور یہ کہ محمد اللہ تعالیٰ کے بندے اور اس کے رسول ہیں۔ عرض کیا : میں اس کے بعد اور کیا کہوں ؟ فرمایا : تم کہو : یا اللہ ! میں تجھے گواہ بناتا ہوں کہ میں مہاجرومجاہد ہوں عکرمہ (رض) نے اس کا اقرار کیا : پھر نبی کریم (صلی اللہ علیہ وآلہ وسلم) نے فرمایا : تم مجھ سے جو چیز مانگو گے میں تمہیں عطاکروں گا۔ عرض کیا : میں آپ سے مال نہیں مانگتا میں قریش میں سب سے زیادہ مالدار ہوں۔ لیکن میری آپ سے صرف ایک گزارش ہے کہ میرے لیے اللہ تعالیٰ سے استغفار کریں پھر عکرمہ (رض) نے عرض کیا : میں نے اللہ تعالیٰ کی راہ میں رکاوٹ ڈالنے کے لیے جو اخراجات کئے ہیں اللہ کی قسم اگر میری عمر دراز ہوئی میں اس سے دگنا چوگنا اللہ تعالیٰ کی راہ میں خرچ کروں گا۔ (رواہ ابن عساکر)