٣٧٤٤٥۔۔۔” مسند عمر “ محمد بن مزاحم کی روایت ہے کہ حضرت عمروبن خطاب (رض) نے حضرت ابوعبیدہ (رض) کی وفات کے بعد حضرت عمیر بن سعد (رض) کو حمص کا گورنر بنا کر بھیجا ایک سال تک حضرت عمر (رض) کے پاس ان کی کوئی خیر خبر نہیں آئی حضرت عمر (رض) نے ایک دن اپنے کاتب کو حکم دیا عمیر کو خط لکھو اللہ کی قسم میرا قسم میرا خیال ہے کہ عمیر نے ہمارے ساتھ خیانت کی ہے۔ خط کا مضمون یہ تھا۔
” جونہی میرا خط تمہیں ملے فورا میرے پاس آجاؤ اور میرا خط پڑھتے ہی تم وہ سارا مال ساتھ لے کر آؤ جو تم نے مسلمانوں کے مال غنیمت میں سے جمع کررکھا ہے “۔
چنانچہ خط پڑھتے ہی حضرت عمیر (رض) مدینہ کے لیے تیار ہوئے اپنا چمڑے کا تھیلالیا اور اس میں اپنا توشہ اور پیالہ رکھا چمڑے کا لوٹا تھیلے سے باندھ کر لٹکا لیا اپنی لاٹھی لی اور حمص سے پیدل چل کر مدینہ منورہ پہنچے مدینہ پہنچے تو آپ کا رنگ بدلا ہوا تھا چہرہ غبار آلود تھا بال لمبے ہوچکے تھے حضرت عمر (رض) کی خدمت میں حاضر ہوئے اور کہا : السلام علیک یا امیرالمومنین حضرت عمر (رض) نے پوچھا : تمہارا کیا حال ہے ؟ عمیر (رض) بولے : آپ مجھے کس حال حال میں دیکھ رہے ہیں کیا آپ دیکھ نہیں رہے کہ میں صحتمند اور پاکیزہ صاف وستھرے خون والا ہوں اور میرے ساتھ میری دنیا ہے جس کی باگ پکڑ کر میں کھینچ لایا ہوں حضرت عمر (رض) سمجھے یہ اپنے ساتھ بہت سامال لائے ہوں گے جو ابھی پہنچے ہیں اس لیے پوچھا : تمہارے ساتھ کیا مال ہے حضرت عمیر (رض) نے جواب دیا : میرے پاس میرا تھیلا ہے جس میں میں اپنا توشہ اور پیالہ رکھتا ہوں پیالہ میں کھا بھی لیتا ہوں سردھولیتا ہوں اور اسی میں کپڑے بھی وھولیتا ہوں ایک لوٹا ہے جس میں وضو کرتا ہوں اور پیسے رکھتا ہوں میری ایک لاٹھی ہے جس پر میں ٹیک لگاتا ہوں اگر کوئی دشمن سامنے آجائے تو اس سے اس کا مقابلہ بھی کرتا ہوں اللہ کی قسم دنیا میرے اس سامان کے علاوہ ہے (یعنی میری دنیاوی ضروریات اس سے پوری ہوجاتی ہیں) پھر حضرت عمر (رض) عہ نے پوچھا : حمص سے تم پیدل چل کر آئے ہو ؟ عرض کیا : جی ہاں ، فرمایا : کیا وہاں تمہارا کوئی تعلقدار نہیں جس سے سواری کے کر آجاتے ؟ عرض کیا : وہاں کے لوگوں نے مجھے سواری نہیں دی اور نہ ہی میں نے ان سے سواری کا طالبہ کیا ہے۔ عمر (رض) نے فرمایا : بہت برے مسلمان ہیں وہ جنہوں نے اپنے گورنر کا خیال نہیں رکھا عمیر (رض) نے کہا : اے عمر ! اللہ سے ڈریئے اللہ تعالیٰ نے غیبت سے منع فرمایا ہے جب کہ میں نے وہاں کے لوگوں کو صبح کی نماز پڑھتے دیکھا ہے (جو شخص نماز پڑھ لیتا ہے وہ اللہ تعالیٰ کی ذمہ داری میں آجاتا ہے) حضرت عمر (رض) نے فرمایا : میں نے تمہیں کہاں بھیجا تھا اور تم نے کیا کیا ؟ عمیر (رض) نے کہا : امیرالمومنین آپ کیا پوچھنا چاہتے ہیں میں سمجھا نہیں ہوں۔ عمر (رض) نے فرمایا : سبحان اللہ (سوال تو واضح ہے) حضرت عمیر (رض) نے کہا : اگر یہ ڈرنہ ہو تاکہ بتانے سے آپ غم گین ہوں گے تو میں آپ کو نہ بتاتا آپ نے جہاں مجھے بھیجا تھا وہاں پہنچ کر میں نے نیک لوگوں کو جمع کیا اور مسلمانوں سے مال غنیمت جمع کرنے کا ان کو ذمہ دار بنایا چنانچہ جب وہ مال جمع کرکے لے آئے میں نے وہ مال صحح مصرف میں خرچ کیا اگر شرعا اس میں آپ کا حصہ ہوتا میں آپ کے پاس ضرور لے کر آتا عمر (رض) نے فرمایا : کیا تم ہمارے پاس کچھ نہیں لائے ؟ حضرت عمیر (رض) نفی میں جواب دیا : حضرت عمر (رض) نے فرمایا یہ تو اچھے گورنر ہیں جو اپنے ساتھ کچھ نہیں لے کر آئے لہٰذا ان کے لیے دوبارہ حمص کی گورنری کا عہدنامہ لکھ دو حضرت عمیر (رض) نے کہا : اب میں آپ کی طرف سے گورنر بننے کو تیار نہیں ہوں اور نہ ہی آپ کے بعد کسی اور کی طرف سے کیونکہ اللہ کی قسم ہیں۔ (اس گورنری میں خرابی سے) بچ نہ سکا۔ میں نے ایک نصرانی سے۔ (امارت کے زعم میں) کہا تھا : اے فلاں اللہ تعالیٰ تجھے ذلیل کرے جب کہ ذمی کو تکلیف پہنچانا برا کام ہے اے عمر آپ نے مجھے گورنر بنا کر بڑی خرابیوں میں مبتلا کیا ہے۔ اے عمر میری زندگی کے سب سے برے دن وہ ہیں جن میں میں آپ کے ساتھ پیچھے رہ گیا (اور دنیا سے چلا نہیں گیا) پھر عمیر (رض) نے حضرت عمر (رض) سے اجازت طلب کی حضرت عمر (رض) نے انھیں اجازت دے دی چنانچہ عمیر (رض) مدینہ سے اپنے گھر واپس لوٹ آئے ان کا گھر مدینہ سے چندمیل کے فاصلہ پر تھا۔
جب حضرت عمیر (رض) چلے گئے تو حضرت عمر (رض) نے فرمایا : میرا تو یہی خیال ہے کہ عمیر نے ہم سے خیانت کی ہے (یہ حمص سے ضرور مال لے کر آیا ہے جو میرے پاس نہیں لایا بلکہ سیدھا اپنے گھر بھیج دیا ہے) پھر عمر (رض) نے حارث نامی آدمی کو سو (١٠٠) دینار دے کر کہا یہ لے جاؤ اور عمیر کے پاس جاکر اجنبی مہمان بن کر ٹھہرجاؤ اگر اس کے گھر میں مال کی فراوانی دیکھو تو فورا میرے پاس لوٹ آؤ اور اگر اس تنگی کی حالت میں میں دیکھو تو سو (١٠٠) دینار اسے دے دینا۔ حارث جب حضرت عمیر (رض) کے پاس پہنچے دیکھا کہ عمیر (رض) ایک دیوار کے ساتھ بیٹھے اپنی قمیص سے جوئیں نکال رہے ہیں حارث نے کہا : السلام علیکم ! عمیر (رض) نے سلام کا جواب دیا : عمیر (رض) نے فرمایا : اللہ تعالیٰ تم پر رحم کرے آجاؤ اور ہمارے مہمان بن جاؤ حارث سواری سے اترا اور ان کے یہاں ٹھہرگئے پھر حضرت عمیر (رض) نے پوچھا : آپ سے آئے ہیں ؟ جواب دیا : مدینہ سے فرمایا : امیرالمومنین کو کس حال میں چھوڑا ہے ؟ جواب دیا : اچھے حال میں تھے پوچھا : مسلمانوں کا کیا حال ہے ؟ جواب دیا : وہ بھی ٹھیک ہیں عمیر (رض) نے پوچھا کیا امیر المؤمین شرعی حدود قائم نہیں کرتے ہیں : حارث نے جواب دیا : امیرالمومنین کے بیٹے سے کبیرہ گناہ ہوگیا تھا امیرالمومنین نے اس پر حد شرعی قائم کی کوڑے سے اس کی پٹائی کی جس سے اس کا انتقال ہوگیا تھا عمیر (رض) نے فرمایا : یا اللہ ! عمر کی مدد فرما جہاں تک میں جانتا ہوں وہ تجھ سے بےانتہامحبت کرتے ہیں۔
چنانچہ حارث عمیر (رض) کے ہاں تین دن تک رہے ان کے ہاں جو کی صرف ایک روٹی ہوتی تھے جسے مہمان کھا لیتا اور میزبان بھوکے رہ جاتے جب بہت زیادہ ہوگیا تو حارث سے کہا : تمہاری وجہ سے ہمارے گھر میں فاقوں تک نوبت پہنچ گئی ہے اگر مناسب سمجھوتو کہیں اور چلے جاؤ اس پر حارث نے سو دینار نکالے اور پیش کیے ساتھ کہا : یہ دینار امیرالمومنین نے آپ لے لیے بھیجے ہیں۔ آپ انھیں اپنے کام میں لائیں عمیر (رض) نے کہا : یہ واپس لے جاؤ ہمیں ضرورت نہیں اتنے میں بیوی بولی : دینار لے لو اگر ضرورت پڑی تو اس میں سے خرچ کرلینا ورنہ مناسب جگہ خرچ کردینا عمیر (رض) فرمایا : اللہ کی قسم میرے پاس کوئی جگہ ایسی نہیں ہے جہاں میں انھیں رکھوں گا اس پر ان کی بیوی نے اپنی قمیص کا نیچے والا دامن پھاڑ کر دیا جس میں انھوں نے دینار رکھ لیے پھر باہر تشریف لائے دو دوچار چار کرکے سب کے سب فقراء، مساکین اور محتاجوں میں تقسیم کردیئے حارث کا خیال تھا کہ عمیر (رض) انھیں بھی کچھ دیں گے مگر عمیر (رض) نے رخصت کرتے وقت اتنا کہا کہ
امیر المومنین کو ہمارا سلام کہنا۔
حارث جب حضرت عمر (رض) کے پاس پہنچے تو آپ (رض) نے پوچھا : عمیر کا کیا حال ہے ؟ حارث نے جواب دیا : وہ تو بہت سختی میں ہیں پوچھا : دیناروں کا کیا بنا ؟ حارث نے کہا : مجھے نہیں پتہ حضرت عمر (رض) نے خط لکھا کہ : اے عمیر یہ خط پاتے ہی فورا ! میرے پاس آجاؤ چنانچہ عمیر (رض) مدینہ آگئے حضرت عمر (رض) نے پوچھا ہم نے جو دینار بھیجے تھے ان کا کیا کیا ؟ عمیر (رض) نے جواب دیا : مجھے جو مرضی آئی کیا آپ ان دیناروں کے متعلق کیوں پوچھ رہے ہیں ؟ حضرت عمر (رض) نے کہا : میں تمہیں قسم دے کر کہتا ہوں مجھے ضرور بتاؤ دیناروں کا کیا کیا ؟ حضرت عمیر (رض) نے جواب دیا : میں نے ان کو اپنے لیے اگلے جہاں میں بھیج دیا ہے (یعنی ضرورت مندوں میں تقسیم کردیئے ہیں)
حضرت عمر (رض) نے فرمایا : اللہ تعالیٰ آپ پر رحم فرمائے پھر حضرت عمر (رض) نے حکم دیا کہ حضرت عمیر (رض) کو ایک وسق (یعنی پانچ من دس سیر) غلہ اور دو کپڑے دیئے جائیں حضرت عمیر (رض) نے فرمایا : مجھے غلہ کی ضرورت نہیں چونکہ میں گھر پر دو صاع (سات سیر) جو چھوڑ کر آیا ہوں ان دوصاع کے کھانے سے قبل اللہ تعالیٰ اور رزق پہنچادیں گے چنانچہ عمیر (رض) نے غلہ تو نہ لیا البتہ دو کپڑے لیتے گئے اور فرمایا : فلاں ام فلاں کے پاس کپڑے نہیں ہیں (اسے دوں گا) پھر اپنے گھر واپس لوٹ آئے اور تھوڑے عرصہ بعد اللہ تعالیٰ کو پیارے ہوگئے حضرت عمر (رض) کو جب ان کی وفات کی خبر پہنچی تو فرمایا : اللہ تعالیٰ عمیر کو غریق رحمت کرے پھر آپ (رض) نے حاضرین سے کہا : ہر شخص اپنے دل میں تمنا و آرزو کرے۔ فرمایا : لیکن میں تمنا کرتا ہوں کہ میرے پاس عمیر (رض) جیسے لوگ ہوں جن کے ذریعے میں مسلمانوں کے امور (سرکاری کاموں) میں مددلوں۔ (رواہ ابن عساکر)