٣٧٤٥٥۔۔۔ عروہ بن زبیر کی روایت ہے کہ جنگ بدر کے بعد عمیربن وہب صفوان بن امیہ کے ساتھ حجر میں مل بیٹھے عمیر قریش کے شیاطین میں سے ایک شیطان تھا اس کا شمار ان لوگوں میں ہوتا تھا جو نبی کریم (صلی اللہ علیہ وآلہ وسلم) اور صحابہ کرام (رض) کو اذیتیں پہنچاتے تھے جب آپ مکہ میں تھے ہر وقت آپ کے پیچھے پڑے رہتے تھے عمیر کا بیٹا دھب بن عمیربدر کے قیدیوں میں سے تھا چنانچہ عمیر نے قلیب کنویں میں دفنائے جانے والے کفار اور پیش آنے والی مصیبت کا تذکرہ کیا صفوان نے کہا : اللہ کی قسم رؤساء قریش کے مرنے کے بعد زندگی میں لطف ومزہ نہیں رہا : عمیر نے بھی کہا : بخدا تم نے سچ کہا : اللہ کی قسم اگر مجھ پر قرض نہ ہوتا جب کہ میرے پاس ادائیگی کا سامان نہیں میرا عیال بھی ہے جس کے ضائع ہونے کا مجھے خدشہ ہے تو میں سوار ہو کر محمد تک پہنچ جاتا حتیٰ کہ اسے قتل کردیتا حالانکہ وہ میرے دادا کی اولاد ہے۔ میرا بیٹا مسلمانوں کے قبضہ میں ہے۔ لہٰذا اسے چھڑالاؤ۔ تمہارا قرضہ میرے ذمہ ہے تمہاری طرف سے میں اسے ادا کروں گا تمہارا عیال میرے عیال کے مساوی ہوگا جب تک زندہ رہیں گے انھیں کسی چیز کی کمی نہیں لگے گی عمیر (رض) نے کہا : ہماری طے ہونے والی بات کو ہر صورت پوشیدہ رکھو بولا : میں یہی کروں گا۔
پھر عمیر نے اپنی تلوار منگوائی اسے تیز کیا اور زہر آلود کرکے نکل پڑا حتیٰ کہ مدینہ پہنچ گیا اس دورن حضرت عمر (رض) مسلمانوں کی جماعت کے ساتھ مسجد میں بیٹھے تھے اور غزوہ بدر کے متعلق آپس میں تبادلہ خیال کررہے تھے یکایک حضرت عمر (رض) کی نظرعمیر بن وہب پر پڑی جب اس نے مسجد کے دروازہ پر اپنا اونٹ بٹھایا عمیر نے اپنی تلوار گلے رکھی تھی عمر (رض) نے فرمایا : یہ کتا اللہ کا دشمن ہے گلے میں تلوار لٹکائے یہاں پہنچ گیا ہے عمر (رض) رسول اللہ (صلی اللہ علیہ وآلہ وسلم) کے پاس گئے اور انھیں عمیر کے آنے کی خبردی آپ نے فرمایا : اسے میرے پاس لاؤ چنانچہ حضرت عمر (رض) نے تلوار کے حمائل سے عمیر کو پکڑا اور گھسٹتے ہوئے اندر لے آئے عمر (رض) نے انصار سے کہا : رسول اللہ (صلی اللہ علیہ وآلہ وسلم) کے پاس چلے جاؤ اور انہی کے پاس بیٹھو کہیں یہ خبیث آپ کو کوئی گزندنہ پہنچائے چونکہ اس کا کوئی بھروسہ نہیں جب حضرت عمر (رض) نے عمیر کو حمائل سے پکڑے ہوئے اندر داخل ہوئے اور آپ نے عمیر کو بحالت تذلیل دیکھا فرمایا اے عمر اسے چھوڑدو۔ اے عمیر میرے قریب آجاؤ عمیر قریب چلا گیا اور کہا : تمہاری صبح اچھی ہو (یہ جاہلیت کا سلام تھا) رسول اللہ (صلی اللہ علیہ وآلہ وسلم) نے فرمایا : اللہ تعالیٰ نے ہمارا ” سلام “ سے اکرام کیا ہے جو کہ اہل جنت کا سلام ہے عمیر بولا : اللہ کی قسم اے محمد میں ابھی نیاہوں آپ نے فرمایا : اے عمیر کیوں آئے ہو ؟ وہ بولا : میں اس قیدی کو لینے آیا ہوں جو آپ کے قبضہ میں ہے اس کے متعلق احسان کرو آپ نے فرمایا : تم نے اپنے گلے میں ننگی تلوار کیوں لٹکا رکھی ہے ؟ وہ بولا : اللہ تعالیٰ تلواروں کا براکرے کیا تلوار بھی کسی چیز سے بےنیاز کرسکتی ہے فرمایا : تم نے سچ کہا بھلا آئے کیوں ہو ؟ جواب دیا : صرف اسی کام کے لیے آیا ہوں (جو ذخر کردیا ہے) ارشاد فرمایا : کیوں تم اور صفواب بن امیہ مقام حجر میں مشورہ کرنے نہیں بیٹھے تھے تم نے قلیب کنویں میں پڑے قریش کا ذکر کیا پھر تو نے کہا : مجھ پر قرضہ نہ ہوتا اور میرے عیال کی بات نہ ہوتی میں چل پڑتا حتیٰ کہ محمد کو قتل کردیتا چنانچہ مجھے قتل کرنے کی اجرت پر صفوان نے تمہارا اہل و عیال کو سنبھالنے کی ذمہ داری قبول کی حالانکہ اللہ تعالیٰ میرے اور تمہارے درمیان حائل ہے عمیربولا : میں گواہی دیتا ہوں آپ اللہ کے رسول ہیں یا رسول اللہ ! ہم آپ کی تکذیب کرچکے وجہ اس کی صرف اتنی تھی کہ آپ ہمارے پاس آسمان کی خبریں لاتے تھے اور وحی کی بات ہم تک پہنچاتے تھے : جب کہ یہ معاہدہ صرف میرے اور صفوان کے درمیان طے پایا تھا تیسرے شخص کو قطعا اس کا علم نہیں تھا مجھے یقین ہوگیا ہے کہ اس معاملہ کی خبر آپ کو صرف اور صرف میرے اور صفوان کے درمیان طے پایا تھا تیسرے کو قطعا اس کا علم نہیں تھا مجھے یقین ہوگیا ہے کہ اس معاملہ کی خبر آپ کو صرف اور صرف اللہ تعالیٰ نے کی ہے تمام تعریفیں اس ذات کے لیے ہیں جس نے مجھے اسلام کی ہدایت سے بہرہ مند کیا اور اس راستے پر چلایا پھر عمیر (رض) نے شہادت حق کا اقرار کیا : رسول اللہ (صلی اللہ علیہ وآلہ وسلم) نے فرمایا : اپنے بھائی کو دین کی تعلیم دو اسے قرآن پڑھاؤ اور اس کا قیدی واگزار کرو صحابہ (رض) نے آپ کا حکم بجالایا پھر عمیر (رض) نے عرض کیا : یارسول اللہ ! میں نے اللہ تعالیٰ کے نور کو مٹانے کے لیے ازحد کوشش کی ہیں اور اللہ کے دین کا اقرار کرنے والوں کو سخت اذیتیں پہنچائی ہیں میں چاہتا ہوں کہ آپ مجھے مکہ واپس جانے کی اجازت دیں تاکہ میں اہل مکہ کو اسلام کی دعوت دوں شاید اللہ تعالیٰ انھیں راہ راست پر لے آئے ورنہ میں انھیں اسی طرح اذیتیں پہچاؤں گا جس طرح آپ کے ساتھیوں کو پہنچاتا رہا ہوں رسول اللہ (صلی اللہ علیہ وآلہ وسلم) نے عمیر (رض) کو اجازت دے دی چنانچہ وہ مکہ چلے گئے۔
جب عمیربن وہب (رض) صفوان کے پاس سے مدینہ کے لیے روانہ ہوئے تھے صفوان قریش سے کہتا تھا : واقعہ بدر کے نعم البدل سے خوش ہوجاؤ۔ صفوان ان دنوں مسافروں سے عمیر (رض) کے متعلق سوال کرتا حتیٰ کہ ایک مسافر آیا اس نے صفوان کو عمیر کے قبول اسلام کی خبردی صفوان نے قسم کھائی کہ عمیر (رض) سے بات نہیں کرے گا اور اسے کوئی نفع نہیں پہنچائے گا جب عمیر (رض) مکہ پہنچے لوگوں کو اسلام کی دعوت دی اور جو ان کی مخالفت کرتا اسے سخت اذیتیں دیتے چنانچہ ان کے ہاتھ پر بہت سے لوگوں نے اسلام قبول کیا۔ (رواہ اسحاق وابن جریر)