٣٧٥٨٢۔۔۔ حرب بن شریح کہتے ہیں مجھے بلعدویہ کے ایک شخص نے اپنے دادا سے مروی حدیث سنائی ہے اس کے دادا کہتے ہیں میں مدینہ کی طرف چلا اور دادی میں جا اترا کیا دیکھتا ہوں کہ دو شخص کھڑے ہیں (جو خریدو فروخت کی باتیں کررہے ہیں) چنانچہ خریدار بیچنے والے سے کہتا ہے : میرے ساتھ معاملہ اچھی طرح سے کرو میں نے دل ہی دل میں کہا : یہ وہی ہاشمی ہے جو لوگوں کو گمراہ کرتا ہے کیا یہ وہی ہے ؟ جب میں نے غور سے دیکھا تو معلوم ہوا کہ یہ ایک کو بصورت شخص ہے پیشانی کشادہ ہے ستواں ناک باریک بھنویں ہیں سینے سے ناف تک بالوں کی باریک لکیر ہے جو دیکھنے میں دھاگے کی طرح لگتی ہے۔ اس نے دو قدرے پرانے کپڑے پہن رکھے تھے ہمارے قریب آیا اور بولا : السلام علیکم ! حاضرین نے سلام کا جواب دیا : اس شخص نے فوراً خریدار کو بلایا، اس نے آتے ہی کہا یا رسول اللہ ! آپ اس سے کہیں میرے ساتھ معاملہ اچھی طرح کرے اس نے ہاتھ بڑھادیا اور بولا : تمہارے اموال تمہاری ملکیت ہیں میں امید کرتا ہوں کہ اللہ تعالیٰ سے قیامت کے دن ملاقات کروں اور مجھ سے کوئی شخص مال کا مطالبہ نہ کرتا ہو جان کا مطالبہ نہ کرتا ہوں اور عزت کا مطالبہ نہ کرتا ہو الایہ کہ کسی حق کی بناپر ہو۔ اللہ تعالیٰ اس شخص پر رحم فرمائے جو بیچنے میں آسانی پیداکرے جو خریدنے میں آسانی پیدا کرے آسانی سے قبضہ کرے سہولت سے دے دے سہولت سے ادا کرے اور سہولت سے تقاضا کرے پھر وہ شخص چل پڑا میں نے کہا : اللہ کی قسم میں اس کے پیچھے ضرور جاؤں گا یہ بہت اچھی اچھی باتیں کرتا ہے اس کے پیچھے ہولیا قریب پہنچنے پر کہاں اے محمد ! اس نے پوری طرح میری طرف مڑ کر کہا کیا چاہتے ہو ؟ میں نے کہا : تو ہی وہ شخص ہے جو لوگوں کو گمراہ کررہا ہے ہلاکت میں ڈال رہا ہے اور ان کے آبائی دین سے انھیں روک رہا ہے ؟ اس نے جواب دیا : یہ تو اللہ کا حکم ہے میں نے کہا : تمہاری دعوت کیا ہے ؟ جواب دیا : میں اللہ کے بندوں کو اللہ کی طرف بلاتا ہوں میں نے کہا : تم کس چیز کا اقرار کرتے ہو ؟ وہ بولا ! ہم گواہی دو کہ اللہ کے سوا کوئی معبود نہیں اور محمد اللہ کے رسول ہیں جو کچھ اللہ تعالیٰ نے مجھ پر نازل کیا ہے اس پر ایمان لاؤ لات وعزی کا انکار کرو نماز قائم کرو زکوۃ دو میں نے پوچھا : زکوۃ کیا ہے ؟ جواب دیا : وہ یہ کہ ہمارا مالدار شخص فقیر و محتاج پر اپنا مال صرف کرے میں نے کہا : بہت اچھی تعلیمات ہیں جنکی تم دعوت دیتے ہو یہ شخص کہتا ہے : چنانچہ سطح زمین پر محمد رسول اللہ (صلی اللہ علیہ وآلہ وسلم) سے بڑھ کر کوئی چیز بری نہیں لگتی تھی پھر یہ کیفیت بھی ہوئی کہ محمد (صلی اللہ علیہ وآلہ وسلم) اپنی جگہ سے ہلنے نہیں پائے تھے کہ مجھے ہر چیز اولاد والدین اور تمام انسانوں سے زیادہ محبوب ہوگئے فرمایا : سمجھ گئے ہو ؟ میں نے عرض کیا جی ہاں یارسول اللہ (صلی اللہ علیہ وآلہ وسلم) میں ابھی ایک پانی پر جاتا ہوں جہاں بہت سارے لوگ جمع ہیں میں انھیں اسلام کی دعوت دیتا ہوں، مجھے امید ہے کہ وہ آپ کی پیروی اختیار کریں گے۔ آپ (صلی اللہ علیہ وآلہ وسلم) نے مجھے اجازت مرحمت فرمائی ، میں نے ان لوگوں کو دعوت دی چنانچہ وہ سب مرد عورتیں اسلام لے آئے رخصت کرتے وقت رسول اللہ (صلی اللہ علیہ وآلہ وسلم) نے اس شخص کے سر پر ہاتھ پھیرا۔ (رواہ ابویعلی وابن عساکر)