٣٧٥٨٧۔۔۔ ابوجعفر کی روایت ہے کہ حضرت عمربن خطاب (رض) نے حضرت علی (رض) کی بیٹی ام کلثوم (رض) سے نکاح کا پیغام بھیجا حضرت علی (رض) نے جواب دیا : میں نے اپنی بیٹیاں جعفر کے بیٹوں کے لیے وقف کردی ہیں۔ حضرت عمر (رض) نے کہا : اے علی اپنی بیٹی سے میرا نکاح کرادو اللہ کی قسم ! سطح زمین پر کوئی شخص ایسا نہیں جو مجھ سے بڑ کر تمہاری بیٹی سے حسن سلوک رکھے۔ حضرت علی (رض) نے کہا : میں نے نکاح کرادیا پھر حضرت عمر (رض) روضہ رسول اللہ (صلی اللہ علیہ وآلہ وسلم) اور منبر کے درمیان مہاجرین کی مجلس میں آئے وہاں علی، عثمان ، زبیر، طلحہ اور عبدالرحمن بن عوف (رض) تشریف فرما تھے چنانچہ آفاق و اطراف سے جو خبر آئی (یا کوئی اہم امرپیش آتا) حضرت عمر (رض) ان حضرات صحابہ کرام (رض) کے پاس تشریف لائے اور انھیں خبر دیتے اور ان سے مشورہ لیتے چنانچہ اس روز بھی حضرت عمر (رض) یہاں تشریف لائے اور فرمایا : اتفاق کرلو۔ صحابہ (رض) نے پوچھا : امیرالمومنین ! کس پر اتفاق کرلیں ؟ فرمایا : اس بات پر کہ علی بن ابی طالب کی بیٹی سے میرا نکاح ہوچکا ہے پھر عمر (رض) نبی کریم (صلی اللہ علیہ وآلہ وسلم) کا فرمان سنانا شروع کردیا کہ آپ نے فرمایا : قیامت کے دن ہر نسب اور ہر تعلق ختم ہوجائے گا مگر میرا نسب اور تعلق باقی رہے گا میں نبی کریم (صلی اللہ علیہ وآلہ وسلم) کا صحبت یافتہ ہوں لہٰذا میں چاہتا ہوں کہ میرا تعلق اور نسب آپ سے جڑا رہے۔ (رواہ ابن سعد وارواہ ابن داھویہ مختصرا ورواہ سعید بن المنصور تبمامہ)