٣٧٦٢٠۔۔۔ یزیدبن حبان حضرت زید بن ارقم (رض) سے روایت نقل کرتے ہیں کہ ایک مرتبہ رسول کریم (صلی اللہ علیہ وآلہ وسلم) ہمیں خطاب کرنے کے لیے کھڑے ہوئے آپ مکہ مکرمہ اور مدینہ منورہ کے درمیان خم نامی چشمہ پر تھے آپ نے حمد وثناء کے بعد وعظ و نصیحت کی اور پھر فرمایا : امابعد ! اے لوگو میں انتظار کررہا ہوں کہ میرے پاس میرے رب کا قاصد آئے میں اس کی بات قبول کروں میں تمہارے درمیان دو چیزیں چھوڑرہا ہوں ایک کتاب اللہ ہے اسمیں ہدایت اور سچائی ہے کتاب اللہ کو مضبوطی سے پکڑے رکھو آپ نے ہمیں کتاب اللہ کی ترغیب دی اور اس پر ابھارا۔ پھر فرمایا : دوسری چیز میرے اہل بیت ہیں میں تمہیں اپنے اہل بیت کے متعلق دہائی دیتا ہوں آپ نے تین بار فرمایا : زیدبن ارقم (رض) سے پوچھا گیا : آپ کے اہل بیت کون ہیں ؟ کیا آپ کی بیویاں اہل بیت نہیں ہیں ؟ زید (رض) نے جواب دیا : آپ کی ازواج مطہرات اہل بیت میں سے تو ہیں ہی لیکن اہل بیت وہ لوگ بھی ہیں جن پر آپ کے بعد صدقہ حرام ہے پوچھا گیا وہ کون ہیں ؟ جواب دیا : وہ آل عباس، آل علی، آل جعفر، اور آل عقیل ہیں پوچھا گیا : کیا ان سب پر صدقہ حرام ہے ؟ جواب دیا : جی ہاں۔ (رواہ ابن جریر)