٣٧٨٤٥۔۔۔ (مسند عمر (رض)) ابو وائل (رض) سے مروی ہے کہ حضرت عمر (رض) ایک بڑھیا کے پاس سے گذرے جو سوق اللیل میں سے دودھ بیچ رہی تھی۔
حضرت عمر (رض) نے اس کو فرمایا : اے بڑھیا : مسلمانوں اور اللہ کے گھر کی زیارت کو آنے والوں کو دھوکا نہ دیا کر اور دودھ میں پانی نہ ملایا کر۔ بڑھیا بولی : ٹھیک ہے، یا امیر المومنین ! اس کے بعد پھر امیر المومنین کا اس بڑھیا کے پاس سے گذر ہوا تو فرمایا : اے بڑھیا : کیا میں نے پہلے تجھے منع نہیں کیا تھا کہ دودھ میں پانی نہ ملایا کر ؟ بڑھیا بولی : اللہ کی قسم ! میں نے ایسا (کچھ) نہیں کیا۔ اس کی بیٹی اندر پردے سے بولی : اماں دھوکا دہی کے ساتھ جھوٹ بولنا بھی شروع کردیا ؟
حضرت عمر (رض) نے اس کی بات سنی تو بڑھیا کو سزا دینے کا ارادہ کیا مگر پھر اس کی بیٹی کی سچ گوئی کی وجہ سے اس کو معاف کردیا۔ پھر اپنے بیٹوں سے فرمایا : تم میں سے کون اس لڑکی سے شادی کرے گا ؟ شاید اللہ پاک اس سے اسی جیسی کوئی پاک روح پیدا فرمادے۔ حضرت عاصم بن عمر (رض) نے فرمایا : اے امیر المومنین ! میں اس سے شادی کروں گا۔ چنانچہ امیر المومنین عمر (رض) نے اسی لڑکی سے اپنے بیٹے کی شادی کردی۔
پھر اس لڑکی سے حضرت عاصم کی ایک بیٹی ام عاصم نام کی پیدا ہوئی۔
پھر ام عاصم سے عبدالعزیز بن مروان نے شادی کی تو ام عاصم کے ہاں عمر بن عبدالعزیز (ثانی عمر) پیدا ہوئے۔ (رواہ ابن النجار)