٣٧٨٦٢۔۔۔ (مسند سعید (رض)) نفیل بن ہشام بن سعید بن زید بن عمروبن نفیل اپنے والد ہشام سے اور وہ ان کے دادا یعنی حضرت سعید (رض) سے روایت کرتے ہیں، حضرت سعید (رض) فرماتے ہیں کہ (ان کے والد یعنی ) زید بن عمرو بن نفیل اور ورقہ بن نوفل دونوں دین حق کی تلاش میں نکلے اور اسی تلاش میں موصل میں ایک راہب کے پاس پہنچے۔ راہب نے زید بن عمرو سے پوچھا : اے اونٹ والے تو کہاں سے آیا ہے ؟ زید بولے : ابراہیم (علیہ السلام) کے بنائے ہوئے گھر (یعنی بیت اللہ کے پاس) سے ؟ پھر راہب نے پوچھا : اور کس چیز کی تلاش میں زید بولے : دین حق کی تلاش میں راہب بولا : تو واپس جا، عنقریب تیری اپنی سرزمین میں وہ دین حق ظاہر ہوجائے گا۔
چنانچہ ورقہ بن نوفل تو نصرانی المذہب ہوگئے جب کہ زید بن عمرو نے نصرانیت کو قبول نہ کیا اور یہ اشعار پڑھتے ہوئے وہ ان سے واپس ہوگئے۔
لبیک حقاً حقاً ، تعبداً ورقاً ۔
میں حاضر ہوں دین حق کے لیے خدا کی بندگی کے لیے اور اس غلامی کے لئے۔
البرا غنی لاالمال۔ وھل مھاجر کماقال۔
میں نیکی ہی کی تلاش میں ہوں نہ کہ مال کی۔ اور نہیں ہے میری ہجرت کسی اور مقصد کے لئے۔
عذت بما عاذبہ ابراھیم۔
میں پناہ مانگتا ہوں جس چیز سے ابراہیم (علیہ السلام) نے پناہ مانگی۔
زید بن عمرو کے بیٹے سعید بن زید (رض) حضور (صلی اللہ علیہ وآلہ وسلم) کی خدمت میں حاضر ہوئے اور عرض کیا : یا رسول اللہ ! میرے والد کو آپ نے دیکھا ہی تھا جیسا کہ آپ نے دیکھا اور جیسا کہ آپ کو خبر بھی پہنچی ہے، لہٰذا آپ ان کے لیے استغفار فرما دیجئے۔
حضور (صلی اللہ علیہ وآلہ وسلم) نے فرمایا : ہاں (ضرور) پھر ارشاد فرمایا : ان کو قیامت کے دن ایک (برحق) امت (کی حالت میں) اٹھایا جائے گا۔
ایک مرتبہ خود زید بن عمروبن نفیل (رح) حضور (صلی اللہ علیہ وآلہ وسلم) کی خدمت میں حاضر ہوئے زید بن حارثہ بھی حضور اکرم (صلی اللہ علیہ وآلہ وسلم) کے ساتھ تھے اور یہ دونوں ایک دستر خوان سے کھا رہے تھے۔ دونوں نے زید بن عمرو بن نفیل کو کھانے پر بلایا تو زید بن عمروبن نفیل نے حضور اکرم (صلی اللہ علیہ وآلہ وسلم) کو ارشاد فرمایا : جو جانور بتوں کے نام پر ذبح کئے جائیں اے بھتیجے ! (محمد ! ) ہم ان کو نہیں کھاتے۔ (ابوداؤد، ابو نعیم، ابن عساکر)