٣٧٨٧٧۔۔۔ مغیرۃ بن شعبہ (رض) سے مروی ہے، فرماتے ہیں : پہلا پہلا دن جب میں نے رسول اللہ (صلی اللہ علیہ وآلہ وسلم) کو پہچانا میں ابو جہل کے ساتھ مکہ میں جارہا تھا، ہم کو رسول اللہ (صلی اللہ علیہ وآلہ وسلم) ملے۔ آپ (صلی اللہ علیہ وآلہ وسلم) نے ابوجہل کو فرمایا : اے ابوالحکم ! اللہ اور اس کے رسول اور اس کی کتاب کی طرف آجاؤ۔
میں تجھے اللہ کی طرف بلاتا ہوں۔ ابوجہل بولا : اے محمد ! تو ہمارے خداؤں کو برا بھلا کہنے سے باز نہیں آئے گا ؟ تو یہی چاہتا ہے ناں کہ ہم گواہی دے دیں کہ تو نے ہم کو رسالت پہنچادی، لے ہم گواہی دیتے ہیں کہ تو نے ہم کو رسالت پہنچا دی۔ یہ سن کر رسول اللہ (صلی اللہ علیہ وآلہ وسلم) واپس ہوگئے۔
پھر ابوجہل میری طرف متوجہ ہوا اور بولا : اللہ کی قسم ! میں جانتا ہوں کہ یہ (محمد (صلی اللہ علیہ وآلہ وسلم)) جو کہہ رہا ہے وہ حق (سچ) ہے (صلی اللہ علیہ وآلہ وسلم) لیکن بات یہ ہے کہ قصی (حضور کے جد امجد) کی اولاد نے کہا تھا : حجابت (بیت اللہ کی دربانی) کے مناصب ہمارے اندر رہیں گے، ہم نے کہا ٹھیک ہے۔ پھر انھوں نے آگے چل کر ) کہا : (بیت اللہ کو آنے والے زائرین کی) مہمان نوازی ہماری ہوگی۔
ہم نے کہا : ٹھیک ہے۔ پھر (آگے چل کر) انھوں نے کہا : ندوہ (کچہری اور سر پنجی یعنی سرداری) ہمارے اندر رہے گی، ہم نے کہا : ٹھیک ہے۔ پھر انھوں نے کہا : سقایہ (ماء زمزم یعنی حاجیوں کو پانی پلانے کی ذمہ داری) ہماری ہوگی، ہم نے کہا : ٹھیک ہے۔ پھر انھوں نے بھی کھلایا اور ہم نے بھی کھلایا (یعنی ہم دونوں خاندانوں نے سخاوت کی اور اپنے اپنے اموال خرچ کئے) حتی کہ سواروں میں مقابلے ہونے لگے تو اب یہ لوگ کہہ اٹھے کہ ہمارے اندر نبی آگیا ہے۔ اللہ کی قسم ! ایسا میں ہرگز نہیں کروں گا (کہ ان کی یہ بڑائی تسلیم کرلوں) ۔ (مصنف ابن ابی شیبہ)