٣٧٩٧٥۔۔۔ اسماعیل بن عبید بن رفاعہ اپنے والد سے روایت کرتے ہیں کہ حضرت عمر بن خطاب (رض) فرماتے ہیں : مجھے رسول اللہ (صلی اللہ علیہ وآلہ وسلم) نے ارشاد فرمایا : اپنی قوم کو جمع کرو۔ میں نے پوچھا : کیا بنی عدی کو ؟
حضور (صلی اللہ علیہ وآلہ وسلم) نے ارشاد فرمایا : نہیں قریش کو۔ حضرت عمر (رض) فرماتے ہیں : چنانچہ میں نے ان کو جمع کیا۔ یہ بات انصار اور مہاجرین کے کانوں میں پڑگئی۔ سب نے کہا :
ضرور قریش کے متعلق وحی اتری ہے۔ حضرت عمر (رض) فرماتے ہیں : چنانچہ میں رسول اللہ (صلی اللہ علیہ وآلہ وسلم) کی خدمت میں حاضر ہوا اور عرض کیا : میں نے اپنی قوم والوں کو جمع کرلیا ہے، کیا ان کو آپ کے پاس لے کر آؤں یا آپ باہر ان کے پاس تشریف لائیں گے ؟ حضور اکرم (صلی اللہ علیہ وآلہ وسلم) نے ارشاد فرمایا : بلکہ میں ہی ان کے پاس جاتا ہوں۔ چنانچہ آپ (صلی اللہ علیہ وآلہ وسلم) نکل کر ان کے پاس تشریف لے گئے اور پوچھا : کیا تم میں تمہارے علاوہ لوگ بھی ہیں ؟ انھوں نے عرض کیا : ہمارے حلیف، ہمارے بھائی بند اور ہمارے غلام ہیں۔ رسول اللہ (صلی اللہ علیہ وآلہ وسلم) نے ارشاد فرمایا : ہمارے حلیف (دوستی کا معاہدہ رکھنے والے) ہم ہی میں سے ہیں اور ہمارے غلام بھی ہم میں سے ہیں۔
پھر ارشاد فرمایا : کیا تم سن رہے ہو (سنو) ! قیامت کے روز تم میں سے میرے دوست صرف متقی اور پرہیزگارہی ہوں گے۔ یاد رکھو ! میں ایسی صورت حال ہرگز نہ پاؤں کہ قیامت کے روز اور لوگ تو اعمال لے کر آئیں اور تم گناہوں کا بوجھ لے کر آؤ۔ اللہ کی قسم ! اللہ کی طرف سے میں تمہارے کچھ کام نہیں آسکتا۔
پھر ارشاد فرمایا : قریش امانت دار ہیں۔ جو ان پر بدی کے ساتھ پیش آئے اللہ اس کو منہ کے بل جہنم میں گرا دے گا۔ یہ بات آپ (صلی اللہ علیہ وآلہ وسلم) نے تین بار ارشاد فرمائی۔ (ابوعبداللہ محمد بن ابراہیم بن جعفر الیزدی فی امالیہ وھو معروف من روایۃ اسماعیل بن عبید بن رفاعہ عن ابیہ عن جدہ رفاعۃ بن رافع وسیاتی فی محلہ)