٣٧٩٨٤۔۔۔ قاضی شریح سے روایت ہے کہ مجھے ابوامامۃ، حارث بن حارث، عمرو بن اسود (رض) نے فقہا کی ایک جماعت میں بتایا، کہ رسول اللہ (صلی اللہ علیہ وآلہ وسلم) نے قریش کو پکارا اور جمع کیا، پھر ان کے درمیان کھڑے ہو کر فرمایا : کہ ہر نبی کو اس کی امت میں مبعوث کیا جاتا رہا اور مجھے تمہاری طرف بھیجا گیا، پھر ایک ایک شخص سے اقرار لینے لگے یہاں تک کہ ان کے آباء و اجداد تک کا نسب بیان کیا، پھر فرمانے لگے : اے فلاں ! اپنی فکر کرو میں اللہ تعالیٰ کے ہاں تمہاری کچھ مدد نہیں کرسکتا، یہاں تک کہ آپ اس معاملہ میں حضرت فاطمۃ (رض) تک پہنچے ان سے بھی وہی بات کہی۔
اس کے بعد فرمایا : اے قریش کی جماعت ! میں ہرگز ایسے لوگ نہ پاؤں جو میرے پاس آئیں اور وہ جنت کی طرف لے جائے جارہے ہوں اور تم میرے پاس دنیا کو کھینچ رہے ہو۔ اے اللہ ! میں قریش کو اپنی امت کی اصلاح شدہ چیزوں میں فساد کی اجازت نہیں دیتا، پھر فرمایا : آگاہ رہو ! تمہارے بہترین رہنما، بہترین لوگ ہیں ، اور قریش کے برے لوگ، برے انسان ہیں، اچھے لوگ اچھوں کے اور برے لوگ بروں کے تابع ہوتے ہیں۔ (بخاری فی تاریخہ، ابن عساکر)