٣٧٩٨٧۔۔۔ (مسند رافع بن خدیج) رسول اللہ (صلی اللہ علیہ وآلہ وسلم) نے حضرت عمر سے فرمایا : میرے پاس اپنی قوم کو جمع کرو، آپ نے انھیں رسول اللہ (صلی اللہ علیہ وآلہ وسلم) کے گھر کے پاس جمع کیا اور وہ لوگ دروازے پر تھے پھر حضرت عمر (رض) آپ کے پاس آکر کہنے لگے : یا رسول اللہ ! آپ ان کے پاس جائیں گے یا میں انھیں آپ کے پاس لے آؤں ؟ آپ نے فرمایا : میں ہی ان کے پاس جاتا ہوں چنانچہ آپ ان کے پاس تشریف لائے اور ان کے پاس کھڑے ہو کر فرمایا : کیا تم میں کوئی اور تو نہیں ؟ وہ کہنے لگے ، جی ہے، ہم میں ہمارے حلیف ہمارے بھانجے اور ہمارے (آزادکردہ) غلام ہیں، آپ نے فرمایا : ہمارے حلیف ہمارے بھانجے اور ہمارے غلام ہم میں شامل ہیں۔
فرمایا : تم لوگ سنتے ہو کہ تم میں پرہیزگار لوگ میرے دوست ہیں، اگر تم وہ ہو تو بہت اچھی بات ہے ورنہ دیکھو غور کرو ! (ایسا نہ ہو کہ ) لوگ قیامت کے روز اعمال لائیں اور تم ایسے بوجھ لاؤ جنہیں اپنی پیٹھوں پر لادے چلے آرہے ہو، اور میں تم سے چہرہ پھیرلوں، پھر آپ نے کھڑے کھڑے ہی دونوں ہاتھ بلند کئے اور وہ لوگ بیٹھے ہوئے تھے، فرمایا : لوگو ! قریش والے صابر و امانتدار ہیں ! تو جس نے ان کے لیے پریشانی اور مصائب تلاش کئے اللہ تعالیٰ اسے قیامت کے روز منہ کے بل گرائے گا، آپ (صلی اللہ علیہ وآلہ وسلم) نے یہ بات تین بارفرمائی۔ (ابن سعد، بخاری فی الادب والبغوی، طبرانی فی الکبیر، حاکم عن اسماعیل بن عبید اللہ بن رفاعہ بن رافع عن ابیہ عن جدہ) ۔