٣٨٠٢٣۔۔۔ مسند بشربن عرفطۃ بن خشخاش الجہنی انھیں بشیر بھی کہا جاتا ہے ان سے روایت ہے کہ جب رسول اللہ (صلی اللہ علیہ وآلہ وسلم) نے قبائل کو اسلام کی دعوت دی، تو قبیلہ جہینہ اور ان کے پیروکارہزار کی تعداد میں آئے، انھوں نے اسلام قبول کرلیا اور رسول اللہ (صلی اللہ علیہ وآلہ وسلم) کے ساتھ غزوہ اور جنگوں میں حاضر رہے، تو بشر بن عرفطۃ نے اپنے اشعار میں کہا :
فتح کی صبح ہم نے حضرت محمد (صلی اللہ علیہ وآلہ وسلم) کے پاس، لوگوں کے آگے ہزار کی تعداد میں پیش پیش تھے، ہم نے مردوں کی تعداد میں اضافہ کردیا، ہم نے اپنے سے پہلے ہزار کی تعداد میں مسلمان ہونے والے نہ پائے، یہ باعزت عرش والے کی نعمت ہے سو ہمارے رب نے ہمیں ہدایت دی اور ہم پر اپنا فضل و کرم کیا، ہم سخت زمین میں محمد (صلی اللہ علیہ وآلہ وسلم) کے سامنے (لڑتے ہوئے) ایسے لشکروں کو تلواروں سے مار رہے تھے جو سرکش اور زیادہ ظالم تھے، جب ہم ان تلواروں کو جنگ کے لیے سونت رہے تھے تو وہ نیاموں سے باہر تھیں یا ان سے خون ٹپک رہا تھا، حنین کے روز کی سختی میں ہم موجود تھے وہ دن موت لانے والا تاریک تھا، محمد (صلی اللہ علیہ وآلہ وسلم) کے اردگرد ہمیں ایسے لشکر لے کر چلے جنہوں نے صرف نشان زدہ چتکبرے گھوڑے پائے تھے۔ (ابن ابی الدنیا فی المغازی والحسن بن سفیان و یعقوب بن سفیان، والبغوی، وقال : اسنادہ مجھول، ابونعیم، خطیب فی المؤتلف، ابن عساکر )