٣٨٠٥٠۔۔۔ عمروبن دینار اور عبید اللہ بن ابی یزید لیثی سے روایت ہے فرمایا : کہ رسول اللہ (صلی اللہ علیہ وآلہ وسلم) کے زمانہ میں بیت اللہ کے آس پاس کوئی دیوار نہیں تھی، لوگ بیت اللہ کے اردگرد نمازیں پڑھتے، پھر جب حضرت عمر (رض) کا زمانہ خلافت ہوا آپ نے اس کے آس پاس دیوار بنادی، عبید اللہ فرماتے ہیں : اس کی دیوار چھوٹی تھی، جسے عبداللہ بن زبیر (رض) نے بنایا : (بخاری)
فاکہی فرماتے ہیں : کہ رسول اللہ (صلی اللہ علیہ وآلہ وسلم) اور صدیق اکبر عمر (رض) کے دور میں مسجد حرام گھروں سے گھری ہوئی تھی جب لوگوں کے لیے تنگی ہوئی تو حضرت عمر نے اسے وسیع کردیا اور اس کے اردگرد معمولی لمبائی کی دیوار بنادی، دیواروں پر چراغ رکھے جاتے، پھر حضرت عثمان (رض) نے اور وسعت کردی، پھر حضرت عبداللہ بن زبیر نے وسعت کی، اس کے بعد ابوجعفر منصور اور پھر اس کے بیٹے مہدی نے وسعت کی۔ (علی تھانوی)