٣٨٠٧٨۔۔۔ حضرت عائشہ (رض) سے روایت ہے فرماتی ہیں : کہ رسول اللہ (صلی اللہ علیہ وآلہ وسلم) نے فرمایا : تمہاری قوم نے بیت اللہ کی شان میں کوتاہی کی، اگر ان کا زمانہ شرک قریب نہ ہوتا تو میں ان کی چھوڑی ہوئی عمارت کو اس سے ملا دیتا، اگر تمہاری قوم کی رائے اسے تعمیر کرنے کی ہو تو میرے پاس آنا میں تمہیں بتاؤں گا کہ انھوں نے کیا چھوڑا تھا، تو آپ نے انھیں وہ جگہ دکھائی جو سات ہاتھ کے قریب تھی، رسول اللہ (صلی اللہ علیہ وآلہ وسلم) نے فرمایا : میں زمین سے ملے ہوئے اس کے دو دروازے بنادیتا جن میں ایک مشرق کی جانب ہوتا اور دوسرا مغرب کی جانب، تمہیں معلوم ہے کہ تمہاری قوم نے اس کا دروازہ اونچا کیوں رکھا ہے ؟ فرماتی ہیں میں نے عرض کیا : نہیں، فرمایا : اس بات کی عزت حاصل کرنے کے لیے کہ جسے وہ چاہیں صرف وہی داخل ہو، جب وہ کسی ایسے شخص کو بلاتے جس کا داخل ہونا انھیں ناگوار گزرتا تو جب وہ زینے پر داخل ہونے کے لیے چڑھتا تو یہ لوگ زینہ چھوڑ دیتے اور وہ گرپڑتا تھا۔ (رواہ ابن عساکر)