٣٨١١٧۔۔۔ عبداللہ بن زریر غافقی سے روایت ہے فرمایا : میں نے حضرت علی بن ابی طالب (رض) کو زمزم کی حدیث بیان کرتے سنا فرمایا : ایک دفعہ عبدالمطلب حجر میں سوئے تھے انھوں نے خواب میں دیکھا کوئی ان سے کہہ رہا ہے : برہ کو کھودو ! انھوں نے کہا : برہ کیا ؟ پھر خواب ختم ہوگیا، یہاں تک کہ جب اگلا دن ہوا آپ اپنی اسی جگہ سوئے تو پھر خواب میں ان سے کوئی کہہ رہا ہے، مصونہ کو کھودو ! انھوں نے کہا : مصونہ کیا ہے ؟ پھر خواب ختم ہوگیا، پھر جب اگلا دن ہوا تو آپ نے اپنی اسی جگہ سوئے تو خواب میں کوئی ان سے کہہ رہا ہے طیبہ کو کھودو ! انھوں نے کہا : طیبہ کیا ہے ؟ پھر ختم ہوگیا، جب اگلا دن ہوا تو آپ اپنی اسی جگہ آئے اور سوگئے خواب میں کوئی دن سے کہہ رہا : زمزم کھودو ! انھوں نے کہا : زمزم کیا ہے ؟ اس نے کہا : جو نہ خشک ہوگا اور نہ اس کی مذمت ہوگی، پھر اس نے اس کی جگہ بتائی، آپ اٹھے اور کھودنے لگے یہاں تک کہ اس کا سراغ لگالیا، قریش کہنے لگے : عبدالمطلب یہ کیا ہے ؟ آپ نے فرمایا : زمزم کھودنے کا حکم دیا گیا، جب وہ ظاہر ہوگیا اور لوگوں نے اسے مقام طتی میں اسی دیکھ لیا تو کہنے لگے : عبدالمطلب ! اس میں تمہارے ساتھ ہمارا حق بھی ہے، یہ ہمارے باپ اسماعیل کا راز ہے، آپ نے فرمایا : یہ تمہارے لیے کیسے ہے ؟ مجھے تم سے علیحدہ اس کے ساتھ خصوصیت دی گئی ہے، وہ کہنے لگے : ہم تمہارے ساتھ مقدمہ لڑیں گے ؟ آپ نے فرمایا : ٹھیک ہے : وہ کہنے لگے : ہمارے اور تمہارے درمین بنی سعد بن ھذیم کی کاہن عورت حاکم ہوگئی، جو شام کے بالائی حصہ میں رہتی ہے عبدالمطلب بنی امیہ کے کچھ لوگوں کے ہمراہ چل پڑے ، اور قریش کے ہر قبیلہ سے کچھ لوگ روانہ ہوئے، اس وقت حجازوشام کے درمیان والی زمین بےآب وگیارہ تھی چلتے چلتے یہ لوگ ان علاقوں کے کسی میدان میں پہنچے تو عبدالمطلب اور ان کے ساتھیوں کا پانی ختم ہوگیا اور انھوں نے مرنے کا یقین کرلیا، پھر لوگوں سے پانی مانگا، وہ کہنے لگے : ہم تم لوگوں کو پانی نہیں سے سکتے، ہمیں بھی تمہارے مصیبت کا ڈر ہے۔
عبدالمطلب نے اپنے ساتھیوں سے کہا : تمہاری کیا رائے ہے ؟ انھوں نے کہا : ہماری رائے آپ کی رائے کے تابع ہے، آپ نے کہا : میری رائے تو یہ ہے کہ تم میں سے ہر شخص اپنی قبر کھودلے، جب بھی تم میں سے کوئی مرجائے گا تو اسے اس کے ساتھ دفن کردیں گے یہاں تک کہ آخری شخص کو اس کا ساتھی دفن کردے گا، تو ایک آدمی کا نقصان تم سب کے نقصان سے کم ہے، چنانچہ انھوں نے ایسا ہی کیا، پھر فرمایا : اللہ کی قسم ! ہم نے اپنے تئیں ہلاکت میں ڈالا ہے اب ہم سفر نہیں کریں گے، ہم یہیں (پانی) تلاش کریں گے شاید اللہ تعالیٰ ہمیں عاجزی کی وجہ سے سیراب کردے آپ نے اپنے ساتھیوں سے فرمایا : چلو ! وہ اور آپ چل پڑے، جب آپ اپنی اونٹنی پر بیٹھے اور وہ آپ کو لے کر اٹھی تو اس کے پیر کے نیچے سے ایک چشمہ پھوٹ پڑا، جس کا پانی میٹھا تھا، آپ نے اپنی اونٹنی بٹھادی آپ کی ساتھیوں نے بھی اپنی اونٹیاں بیٹھا دیں، پانی پیا اور خوب سیراب ہوگئے، پھر (سفر کے ) ساتھیوں کو بلایا، آؤ پانی پی لو، اللہ تعالیٰ نے ہمیں پانی دیا ہے، چنانچہ وہ آئے اور خود بھی پیا اور جانوروں کو سیراب کیا، پھر (خود ہی) کہنے لگے : عبدالمطلب ! اللہ کی قسم ! تمہارے حق میں فیصلہ ہوگیا جس ذات نے تمہیں اس صحرا میں پانی دیا ہے اسی نے تمہیں زمزم سے سیراب کیا ہے، چلو وہ چشمہ تمہارا ہی ہے ہم تم سے نہیں جھگڑیں گے۔ (ابن اسحاق فی المبتداء والازرقی، بیھقی فی الدلائل)