٣٨٤١٦۔۔۔ جب تک رومی اعماق یادابق پر نہیں اتریں گے قیامت قائم نہیں ہوگی، پھر ان کی طرف مدینہ سے ایک لشکر نکلے گا جو اس دن روئے زمین سے بہتر لوگوں پر مشتمل ہوگا۔ جب وہ لڑائی کے لیے صفیں باندھیں گے تو روم کہیں گے : ہمارے اور ان لوگوں کے درمیان سے ہٹ جاؤ جنہوں نے ہمارے لوگ قیدی بنائے ہیں، ہم ان سے جنگ کریں ، تو مسلمان کہیں گے : نہیں، اللہ کی قسم ! ہم تمہارے اور اپنے بھائیوں کے درمیان سے نہیں ہٹیں گے۔ پھر وہ آپس میں جنگ کریں گے، ایک تہائی شکست کھائیں گے جن کی اللہ تعالیٰ کبھی توبہ قبول نہیں کرے گا، ایک تہائی قتل ہوں گے، وہ اللہ تعالیٰ کے نزدیک سب سے افضل شہید ہوں گے، اور ایک تہائی فتح پائیں گے، جو کبھی فتنہ میں مبتلا نہیں ہوں گے، پھر وہ قسطنطنیہ فتح کریں گے، زیتون کے درخت کے ساتھ اپنی تلواریں لٹکا کر وہ آپس میں غنیمت تقسیم کررہے ہوں گے، کہ اچانک شیطان ان میں چیخ کرک ہے گا، کہ مسیح دجال تمہارے گھروں میں آچکا ہے، چنانچہ وہ نکلیں گے، اور یہ جھوٹ ہوگا جب وہ شام آئیں گے (اس وقت) دجال نکلے گا۔ (انہی ایام) وہ جنگ کی تیاری کررہے ہوں گے، صفیں درست کررہے ہوں گے، جب نماز قائم ہوگی تو عیسیٰ (علیہ السلام) بن مریم (علیہما السلام) (آسمان سے) اتریں گے، ان کی امامت کروائیں گے، جب اللہ کا دشمن انھیں دیکھے گا تو ایسے پگھلے گا جیسے پانی میں نمک گھلتا ہے، اگر وہ اسے چھوڑتے تو پگھل جاتا یہاں تک کہ ہلاک ہوجائے، لیکن اللہ تعالیٰ خود اسے قتل کرے گا اور انھیں اس کا خون اپنے نیزے پر لگادکھائے گا۔ (مسلم عن ابوہریرہ )
تشریح :۔۔۔ یعنی قتل تو عیسیٰ (علیہ السلام) کے ہاتھوں ہوگا نسبت اللہ تعالیٰ کی طرف مجازی ہے جیسے ومارمیت اذرمیت ولکن اللہ رمی، نبی (صلی اللہ علیہ وآلہ وسلم) کے بارے میں منقول ہے۔