٣٨٧٤٤۔۔۔ دجال نکلے گا تو ایک مومن شخص اس کا رخ کرے گا توا سے دجال کے مسلح لوگ ملیں گے وہ اس سے کہیں گے : تیرا کہاں کا ارادہ ہے ؟ وہ کہے گا : میں اس شخص کا قصد کرتا ہوں جو نکلا ہے، وہ اس سے کہیں گے کیا تو ہمارے رب پر ایمان نہیں رکھتا ؟ وہ کہے گا : ہمارے رب میں کچھ کمی نہیں، وہ کہیں گے اسے مارڈالو، ان میں سے کوئی دوسرے سے کہے گا : کیا تمہارے رب نے تمہیں اپنی غیر موجودگی میں کسی کو قتل کرنے سے منع نہیں کیا ؟ چنانچہ وہ اسے دجال کے پاس لے چلیں گے، جب مومن اسے دیکھے گا تو کہے : لوگو ! یہ وہی دجال ہے جس کا رسول اللہ (صلی اللہ علیہ وآلہ وسلم) نے تم سے ذکر کیا تھا، تو دجال حکم دے گا اسے چیرا جائے گا، کہے گا : اسے پکڑو اور اس کا سرزخمی کرو اس کی پیٹھ اور پیٹ بیحد پیٹے گا اور کہے گا : کیا تو مجھ پر ایمان نہیں رکھتا ؟ وہ کہے گا : تو خیر سے محروم بڑا جھوٹا ہے، چنانچہ اس کے بارے میں حکم ہوگا اسے آروں کے ذریعہ سرتاقدم چیز دیا جائے گا پھر دجال اس کے دونوں دھڑوں کے درمیان چل کر کہے گا : اٹھ ! تو وہ سیدھا کھڑا ہوجائے گا۔ دجال اس سے کہے گا : کیا تیرا مجھ پر ایمان ہے ؟ وہ کہے گا : تیرے بارے میں میری بصیرت بڑھ گئی ہے پھر وہ کہے گا : لوگو ! میرے بعد وہ کسی سے ایسا نہیں کرسکے گا، دجال اسے ذبح کرنے کے لیے پکڑے گا تو اس کی گردن سے ہنسلی تک کا حصہ تانبے کا بن جائے گا وہ کچھ نہ کرسکے گا اس کے پاتھ پاؤں سے پکڑ کر پھینک دے گا، لوگ سمجھتے ہوں گے کہ اس نے اسے آگ میں پھینکا جبکہ اسے جنت میں ڈالا گیا، پھر رسول اللہ (صلی اللہ علیہ وآلہ وسلم) نے فرمایا : اس شخص کی گواہی اللہ کے ہاں سب سے بڑی ہوگی۔ (مسلم عن ابی سعید)