٣٨٧٦٩۔۔۔ اللہ تعالیٰ نے جو نبی بھی بھیجا اس نے اپنی امت کو دجال سے ڈرایا ہے نوح (علیہ السلام) اور ان کے بعد کے نبیوں نے اس سے ڈرایا، وہ تم میں نکلے گا۔ اس کی حالت تم سے مخفی نہیں اور نہ مخفی رہے گی، تمہارا رب کانے پن سے پاک ہے جب کہ اس کی داہنی آنکھ کانی ہوگی گویا پھولا ہوا انگور کا دانہ ہے خبردار ! اللہ تعالیٰ نے تمہارے خون و اموال اسی طرح حرام قرار دئیے ہیں جیسے یہ شہر اور مہینہ محرم ہے خبردار ! کیا میں نے پہنچا دیا ؟ اے اللہ گواہ رہنا ! (تین بار فرمایا) ارے دیکھنا میرے بعد کفر کی طرف نہ لوٹنا کہ ایک دوسرے کی گردنیں اڑانے لگو۔ (بخاری عن ابن عمر)