٣٨٨١٩۔۔۔ دجال اس وقت نکلے گا جب دین میں کمزوری اور علم میں زوال ہوگا، اس کی چالیس راتیں ہوں گی جن میں وہ زمین پر پھرے گا، اس زمانے کا ایک دن سال کی طرح کا اور ایک دن مہینے جیسا اور ایک جمعہ جیسا اور باقی دن تمہارے دنوں جیسے ہوں گے، اس کا ایک گدھا ہوگا جس پر سوار ہوگا، اس کے کانوں کی چوڑائی چالیس گز ہوگی۔ وہ (دجال) لوگوں سے کہتا پھرے گا ! میں تمہارا رب ہوں، وہ کانا ہوگا اور تمہارا رب اس عیب سے پاک ہے اس کی پیشانی پہ ک، ف، ر، لکھا ہوگا جسے ہر پڑھا لکھا اور ان پڑھ ایماندارپڑھ لے گا وہ مکہ و مدینہ کے سواہرجگہ جائے گا اللہ تعالیٰ ان دونوں کو اس کے لیے حرام قرار دے دے گا، ان کے دروازوں پر فرشتے کھڑے ہوں گے، اس کے ساتھ روٹی کے پہاڑ ہوں گے، جب کہ لوگ فقروفاقہ میں مبتلا ہوں گے صرف وہ لوگ خوشحال ہوں گے جو اس کی پیروی کریں گے۔
اس کے ساتھ دونہریں ہوں گی مجھے ان دونوں کا اس (دجال) سے زیادہ علم ہے ایک نہر جسے وہ جنت کہے گا اور ایک نہر جسے وہ جہنم کہے گا، جسے وہ اپنی جنت میں داخل کرے گا وہ جہنم ہوگی اور جسے اپنی جہنم میں داخل کرے گا وہ جنت ہوگی، اللہ تعالیٰ اس کے ساتھ شیاطین بھیجے گا جو لوگوں سے باتیں کریں گے اس کے ہمراہ بہت بڑا فتنہ ہوگا، اس کو حکم دے گا تو بارش ہوجائے گی جو لوگوں کو نظر آئے گی ایک شخص کو قتل کرکے زندہ کرے گا یہ بھی لوگوں کی نظر کا کھیل ہوگا، اس کے علاوہ کسی پر اس کا بس نہ چلے گا۔
لوگوں سے کہے گا : لوگو ! ایسا رب ہی نہیں کرتا ؟ مسلمان لوگ شام میں جبل دخان کی طرف بھاگ جائیں گے وہ آکر ان کا محاصرہ کرکے انھیں سخت محنت ومشقت میں ڈالے گا پھر عیسیٰ بن مریم (علیہما السلام) نازل ہوں گے وہ سحری کے قریب آواز دیں گے، لوگو ! جھوٹے خبیث کی طرف کیوں نہیں نکلتے ہو، لوگ کہیں گے، یہ کسی جن کی آواز ہے، جب وہاں پہنچیں تو کیا دیکھیں گے کہ عیسیٰ (علیہ السلام) ہوں گے۔
پھر نماز قائم ہوگی ان سے کہا جائے گا : روح اللہ ! آپ آگے ہوں، وہ فرمائیں گے : تمہارا امام آگے ہو اور وہ نماز پڑھائے، جب فجر کی نماز پڑھ چکے گے تو اس (دجال) کی طرف نکلیں گے اللہ کا دشمن جب انھیں دیکھے گا تو یوں پگھلے گا جیسے پانی میں نمک گھلتا ہے عیسیٰ (علیہ السلام) اس کے پیچھے چلیں گے اور اسے قتل کردیں گے یہاں تک کہ شجروحجر پکاریں گے : روح اللہ ! یہ یہودی ہے آپ اس کے پیروکاروں میں سے کسی کو نہیں چھوڑیں گے سب کو قتل کردیں گے۔ (مسند احمد، ابن خزیمہ، ابویعلی، حاکم ضیاء عن جابر)