٣٩٠٤٠۔۔۔ اے عائشہ ! تین مقامات پر تو کوئی کسی کو یاد نہیں آئے گا، ترازو کے وقت یہاں تک کہ وہ بوجھل ہوتا ہے یا ہلکا، اعمال ناموں کے اڑنے کے وقت، دائیں ہاتھ میں ملتا ہے یا بائیں ہاتھ میں، اور جب گردن نکلے گی جو ان پر چھا جائے گی ان سے غضب ناک ہو کر کہے گا : مجھے تین طرح کے لوگوں پر مسلط کیا گیا ہے، جس نے اللہ کے ساتھ کوئی دوسرا معبود (کسی بھی صورت میں) بنایا، جس کا آخرت کے دن پر ایمان نہیں، اور مجھے ہر متکبر اور ضدی پر مسلط کیا گیا ہے پھر وہ ان پر غالب آجائے گی اور انھیں سختیوں میں پھینک دیا جائے گا۔
جہنم کا پل بال سے باریک اور تلوار سے تیز ہوگا اس پر آنگڑے اور کانٹے ہوں گے، جسے اللہ تعالیٰ چاہے گا اسے پکڑ لیں گے، لوگ اس پر، آنکھ کی جھپک بجلی کی چمک ، ہوا کے جھونکے، عمدہ گھوڑوں اور سواریوں کی طرح گزریں گے فرشتے کہہ رہے ہوں گے : اے رب سلامت رکھ، سلامت رکھ، کوئی تو سالم پار ہوجائے گا کوئی خراش کھاکر پار ہوگا کوئی منہ کے بل جہنم میں جاگرے گا۔ (مسند احمد عن عائشۃ)