٣٩٦٨٧۔۔۔ (ایضا) رسول اللہ (صلی اللہ علیہ وآلہ وسلم) نے فرمایا : دجال اللہ کا دشمن نکلے گا اور اس کے ساتھ یہودیوں اور مختلف لوگوں پر مشتمل لشکر ہوگا اس کے ساتھ جنت و دوزخ بھی ہوگا کچھ لوگوں کو مارے گا اور زندہ کرے گا اس کے ساتھ ثرید کا پہاڑ اور پانی کی نہر ہوگی اور میں تم سے اس کی علامت بیان کردیتا ہوں وہ نکلے تو اس کی آنکھ سپاٹ ہوگی اس کی پیشانی پر ” کافر “ لکھا ہوگا جسے ہر پڑھا اور ان پڑھ پڑھ لے گا اس کی جنت جہنم ہے اور جہنم جنت ہے وہی رحمت سے دور (دجال ہے) کذاب ہے تیرہ ہزار یہودی عورتیں اس کی پیروی کریں گی اللہ تعالیٰ اس پر رحم کرے جو اس روز اپنے بیوقوف کو اس کی پیروی سے منع کرے گا اس پر غلبہ قرآن کی وجہ سے ہوگا کیونکہ اس کی حالت سخت آزمائش والی ہوگی اللہ تعالیٰ مشرق ومغرب سے شیاطین کو بھیجے گا جو اس سے کہیں گے : جو چاہو اس میں ہماری مددحاصل کرو تو وہ ان سے کہے گا : جاؤ اور لوگوں کو بتاؤ کہ میں ان کا رب ہو اور میں ان کے پاس اپنی جنت اور جہنم لایا ہوں چنانچہ شیاطین چل پڑیں گے ایک آدمی کے پاس سو سے زائد شیاطین آئیں گے اور اس کے سامنے اس کے باپ بیٹے بھائیوں غلاموں اور دوست کی صورت میں آکر کہیں گے : اے فلاں ! کیا تو ہمیں جانتا ہے تو وہ شخص ان سے کہے گا : ہاں یہ میرا باپ ہے یہ میری ماں ہے یہ میری بہن اور یہ میرا بھائی ہے پھر وہ ان سے کہے گا تمہاری کیا خبر ہے ؟ تو وہ کہیں گے : بلکہ تو ہی اپنی خبر بتاتو وہ کہے گا : ہمیں تو یہ اطلاع ملی ہے کہ اللہ کا دشمن دجال نکل نکل آیا ہے تو شیاطین اس سے کہیں گے : ٹھہراؤ ! ایسا نہ کہو کیونکہ وہ تمہارا رب ہے جو تم میں فیصلہ کرنا چاہتا ہے یہ اس کی جنت ہے جیسے وہ لے کر آیا ہے اور یہ اس کا جہنم ہے اور اس کے ساتھ نہریں اور کھانا ہے تو کھانا صرف وہی ہوگا جو پہلے سے ہوگا جو اللہ تعالیٰ چاہے گا۔
پھر وہ شخص کہے گا : تم جھوٹ کہتے ہو تم شیاطین ہی ہو اور وہ بڑا جھوٹا ہے جبکہ ہمیں رسول اللہ (صلی اللہ علیہ وآلہ وسلم) نے پہنچا دیا اور تمہاری بات بتادی ہمیں ڈرایا اور آگاہ کیا تمہارا آنا مبارک ہو تم شیاطین ہو اور وہ اللہ کا دشمن ہے اللہ تعالیٰ عیسیٰ (علیہ السلام) کو ضرور لائیں گے جو اسے قتل کریں گے چنانچہ وہ ذلیل ورسوا ہو کر لوٹ جائیں گے اس کے بعد رسول اللہ (صلی اللہ علیہ وآلہ وسلم) نے فرمایا : میں نے تمہارے سامنے یہ اس لیے بیان کیا ہے تاکہ تم اسے سمجھو اس کی سوجھ بوجھ رکھو اسے یاد کرکے اس پر عمل کرو اور پچھلے لوگوں کو بتاؤ تم میں سے ہر دوسرا دوسرے سے بیان کردے کیونکہ اس کا فتنہ سب سے سخت ہے۔ (نعیم وفیہ سوید بن عبدالعزیز متروک)