٣٩٧٠٩۔۔۔ حضرت علی (رض) سے روایت ہے کہ انھوں نے لوگوں سے خطاب کیا حمد وثناء اور درود وسلام کے بعد فرمایا : لوگوں کی جماعتو ! مجھے گم ہونے سے پہلے مجھ سے پوچھ لو ! تین بار ایسا فرمایا تو صعصعۃ بن صوجان العبدی نے کھڑے ہو کر کہا : امیر المومنین ! دجال کب نکلے گا : فرمایا : صعصعۃ ٹھہرجاؤ ! اللہ تعالیٰ کو تمہارے کھڑے ہونے کا علم ہے اور اس نے تمہاری بات سن لی ہے جس سے پوچھا گیا وہ پوچھنے والے سے زیادہ نہیں جانتا لیکن اس کے نکلنے کی علامات، اسباب اور فتنے ہیں جو ایک سال میں قدم بقدم پے درپے ہوں گے، پھر اگر چاہوں تو میں تمہیں اس کی علامات بتادوں تو وہ کہنے لگا امیر المومنین ! میں نے اسی کے متعلق تو آپ سے پوچھا ہے آپ نے فرمایا : تو شمار کرو اور جو میں کہنے لگا اسے یاد رکھو ! جب لوگ نمازیں چھوڑنے لگیں امانتیں ضائع کرنے لگیں فیصلہ کمزور ہو ظلم کو فخر سمجھا جائے حکمران فاجر ہوں وزراء خائن ہوں اراکین حکومت ظالم ہوں۔ فاسق قراء ہوں ظلم عام ہوجائے زنا پھیل جائے سودی کاروبار ظاہر ہوجائے رشتے ناتے ختم کردئیے جائیں گانے والی رکھی جانے لگیں شرابیں پی جاتی ہوں وعدے توڑے جانے لگیں عشاء کی نماز ضائع ہونے لگے لوگ باجماعت نمازوں میں سستی کرنے لگیں مساجد منقش ہوں منبر لمبے ہوں قرآن پر زیور (سونا چاندی) لگایا جانے لگے لوگ رشوت لینے لگیں سود کھانے لگیں بیوقوفوں کو گورنر بنانے لگیں قتل وخون کو معمولی بات سمجھیں دین کو دنیا کے بدلے بیچنے لگیں اور دنیا کی لالچ میں عورت اپنے خاوند کے ساتھ تجارت کرنے لگے عورتیں۔ (سٹیجوں) منبروں پر چڑھنے لگیں اور مردوں کی مشابہت اختیار کرلیں اور مرد عورتوں کی صورت بنانے لگیں اور پہچان کی بناء پر سلام کریں گواہ بغیر مطالبہ گواہی دے اور قسم کھلوانے سے پہلے قسم کھائے اور بھیڑیوں جیسے دلوں پر بھیڑ کی کھالیں پہنیں ان کے دل ایلوے (اندرائن تمبے) سے زیادہ کڑوے ہوں اور زبانیں شہد سے شیریں ان کے باطن مردار سے زیادہ بدبودار ہوں بےدینوں سے دین حاصل کیا جائے بھلائی کو برائی اور برائی کو نیکی سمجھا جائے نجات نجات اور جلدی جلدی !
اس وقت عباد ان کے لوگ بہترین رہنے والے ہوں گے : ان میں سونے والا اللہ تعالیٰ کی راہ جہاد کرنے والے کی طرح ہے وہ پہلی جگہ ہے جہاں کے لوگ عیسیٰ بن مریم (علیہ السلام) پر ایمان لائے لوگوں نے ایسا زمانہ بھی دیکھنا ہے کہ کوئی کہے گا : کاش میں عبادان کے کسی گھر کی اینٹ پر لگی گھاس ہوتا تو اصبغ بن نباتہ نے کھڑے ہو کر کہا : امیر المومنین ! دجال کون ہے فرمایا : صافی بن صائد جس نے اس کی تصدیق کی وہ بدبخت ہے اور جس نے اس کی تکذیب کی وہ نیک بخت ہے خبردار ! دجال کھائے پئے گا بازاروں میں چلے گا جب کہ اللہ تعالیٰ ان ضروریات سے بلند شان ہے خبردار ! پہلے گزر کے ساتھ اس کی لمبائی چالیس گز ہوگی اس کے نیچے سفید گدھا ہوگا اس کا ہر کان تیس گز کا ہوگا اس کے کھر سے دوسرے کھر تک کا فاصلہ ایک دن رات۔ (٢٤ گھنٹوں) کی مسافت ہوگی گھاٹ کی طرح زمین اس کے لیے لپٹ دی جائے گی اپنے ہاتھ سے بادل پکڑے گا سورج کے غروب ہونے سے مغرب میں پہنچ جائے ٹخنوں تک سمندر میں گھس جائے گا اس کے سامنے دھوئیں کا پہاڑ ہوگا اس کے پیچھے سبز پہاڑ ہوگا دونوں پہاڑوں کے درمیان ایسی آواز سے پکارے گا جو سنی جائے گی، میرے دوستو ! میری طرف آؤ میرے دوستو ! میرے پیارو ! میری طرف آؤ ! میں نے ہی برابر پیدا کیا میں نے اندازہ ٹھہرایا اور ہدایت دی میں ہی تمہارا سب سے اعلیٰ رب ہوں اللہ کے دشمن نے جھوٹ کہا تمہارا رب ایسا نہیں خبردار ! دجال کے زیادہ تر پیروکار و مددگار یہودی اور حرامزادے ہوں گے اللہ تعالیٰ اسے عیسیٰ (علیہ السلام) کے ہاتھوں شام کی گھاٹی میں قتل کرے گا جسے عقبہ افیق کہتے ہیں کی میں اس وقت دن کی تین گھڑیاں گزر چکی ہوں گی۔
اس وقت صفا پہاڑ سے جانور کا ظہور وخروج ہوگا اس کے پاس سلیمان (علیہ السلام) کی انگوٹھی موسیٰ بن عمران (علیہ السلام) کا عصا ہوگا وہ انگوٹھی سے ہر مومن کی پیشانی پر نشان لگائے : یہ پکا مومن ہے ہر کافر کی پیشانی پر داغ لگائے گا : یہ پکا کافر ہے آگاہ رہنا اس وقت مومن کافر سے کہے گا : کافر ! تیرا ناس ہوا ! تمام تعریفیں اللہ کے لیے جس نے مجھے تجھ جیسا نہیں بنایا اور کافر مومن سے کہے گا : مومن تیری لیے بہتری ہو، کاش ! میں تیرے ساتھ ہوتا تو میں بھی کامیاب ہوتا اس کے بعد کی باتیں مجھ سے نہ پوچھو کیونکہ رسول اللہ (صلی اللہ علیہ وآلہ وسلم) نے مجھے چھپانے کی وصیت کی ہے۔ (ابن المنادی وفیہ حماد بن عمرومتروک عن السری بن قال فی المیزان لایعرف وقال لازدی الآیت حج بہ)