٣٩٧٦٧۔۔۔ کندہ کے ایک شخص سے روایت ہے کہ میں حضرت عائشہ (رض) کے ہاں گیا درمیان میں پردہ تھا میں نے عرض کیا : آپ نے رسول اللہ (صلی اللہ علیہ وآلہ وسلم) سے سنا کہ آپ فرماتے ہیں کہ ایک گھڑی ایسی آئے گی جس میں وہ کسی کے لیے بھی شفاعت نہیں کرسکیں گے ؟ فرمایا : میں نے آپ سے پوچھا اس وقت ہم ایک سفر میں تھے آپ نے فرمایا : ہاں جس وقت صراط رکھا جائے گا جب کچھ چہرے سفید اور کچھ چہرے کالے ہوں گے اور پل کے وقت جب اسے گرم کرکے تیز کیا جائے گا تلوار کی دھار کی طرح تیز اور انگارے کی طرح گرم کیا جائے گا مومن تو گزر جائے گا اسے کوئی نقصان نہیں پہنچے گا رہا منافق توجونہی چل کر وہ درمیان میں پہنچے گا اس کی قدم جلادے گا تو وہ اپنے ہاتھوں سے قدموں کو پکڑ لے گا تم نے دیکھا ہوگا جب کوئی شخص پیدل ننگے پاؤں چل رہا اور اسے کوئی کانٹا چبھ جائے تو وہ کانٹا نکالنے کی کوشش کرتا ہے ایسے ہی تو زبانیہ فرشتے اس کی پیشانی پر گرز ماریں گے جس سے وہ جہنم میں گرپڑے گا اور پچاس سال تک نیچے جاتا رہے گا میں نے عرض کیا : کیا وہ بوجھل ہوگا ؟ آپ نے فرمایا : وہ پانچ حاملہ اونٹنیوں جتنا بھاری ہوگا پس اس دن مجرم اپنی پیشانیوں سے پہچان لیے جائیں گے اور پیشانیوں اور قدموں سے پکڑے جائیں گے۔ (رواہ عبدالرزاق)