4044: حمید الطویل روایت کرتے ہیں کہ حضرت انس (رض) نے فرمایا : ایک شخص نبی (صلی اللہ علیہ وآلہ وسلم) کے لیے وحی لکھا کرتا تھا۔ اس شخص نے سورة بقرہ پڑھ رکھی تھی۔ اور ہم میں جب کوئی سورة بقرہ اور سورة آل عمران پڑھ لیتا تھا تو بہتر معتبر سمجھا جاتا تھا۔
حضور (صلی اللہ علیہ وآلہ وسلم) اس کو لکھواتے غفور ا رحیما تو وہ کہتا علیما حکیما لکھوں ؟ آپ فرماتے لکھو جو چاہو۔ آپ اس کو علیما حکیما لکھواتے تو وہ پوچھتا سمیعا بصیرا لکھوں ؟ آپ فرماتے جیسے چاہو لکھو ۔ پھر وہ شخص اسلام سے پھر گیا اور مشرکوں کے ساتھ جا ملا۔ وہاں جا کر کہنے لگا میں محمد کو تم سے زیادہ جانتا ہوں ۔ میں اس کے پاس جو چاہتا لکھ دیتا تھا۔
پھر وہ شخص مرگیا آپ (صلی اللہ علیہ وآلہ وسلم) نے فرمایا زمین اس کو قبول نہ کرے گی۔
حضرت انس (رض) فرماتے ہیں مجھے حضرت ابو طلحہ (رض) نے بتایا کہ وہ اس جگہ گئے جہاں وہ مرا تھا تو اس کو زمین پر پڑا ہوا پایا۔ حضرت ابو طلحہ (رض) نے لوگوں سے پوچھا یہ اس کا کیا حال ہے ؟ انھوں نے کہا : ہم نے کئی بار اس کو دفن کرلیا مگر زمین اس کو قبول ہی نہیں کرتی۔