4060: شعبی (رح) عبداللہ (رض) سے روایت کرتے ہیں وہ فرماتے ہیں ہم حضرت عمر بن خطاب (رض) کی مجلس میں بیٹھے تھے۔ ہمارے درمیان فضائل قرآن پر گفتگو چل پڑی۔ (کہ سب سے افضل سورت یا آیت کون سی ہے) ایک شخص نے کہا سورة بنی اسرائیل کی آخری آیت کسی نے کہا : کفھیعص اور طہ۔ کسی نے کہا : یس اور تبارک الذی۔ یونہی آگے پیچھے بات کرتے رہے۔ حاضرین مجلس میں ایک علی بن ابی طالب (رض) بھی تھے۔ آپ نے کوئی بات نہیں فرمائی۔ آخر آپ (رض) نے فرمایا : جب سب خاموش ہوگئے ؟ تم کو آیت الکرسی نہیں معلوم کیا ؟ عبداللہ کہتے ہیں : ہم نے کہا : اے ابو الحسن اس کے بارے میں آپ نے جو کچھ نبی کریم (صلی اللہ علیہ وآلہ وسلم) سے سنا ہو ہمیں بھی سنائیے ! حضرت علی (رض) نے فرمایا :
میں نے رسول اکرم (صلی اللہ علیہ وآلہ وسلم) کو فرماتے ہوئے سنا :
انبیاء کے سردار آدم ہیں۔ عرب کے سردار محمد ہیں (صلی اللہ علیہ وآلہ وسلم) فارس کے سردار مسلمان ہیں، روم کے سردار صہیب ہیں، حبشہ کے سردار بلال ہیں، درختوں کا سردار بیری کا درخت ہے، مہینوں کا سردار حرم والے ماہ ہیں، (رجب ، ذوالقعدہ، ذوالحجہ اور محرم) جب کہ بعد میں شرعی حرمت ختم کردی گئی تھی اور ماہ صیام کو سب سے زیادہ افضل قرار دیا گیا) دنوں کا سردار جمعہ کا دن ہے، کلاموں کا سردار قرآن ہے، قرآن کی سردار سورة البقرہ ہے۔ اور سورة البقرہ کی سردار آیت آیت الکرسی ہے۔ اس میں پچاس کلمہ ہیں اور ہر کلمہ میں پچاس برکتیں ہیں۔ (ابو عبداللہ منصور بن احمد الہروی فی حدیثہ والدیلمی)
ابن عساکر نے اس کو حضرت علی (رض) سے مختصرا روایت کیا ہے آپ (رض) نے فرمایا : کیا تم آیۃ الکرسی کی فضیلت نہیں جانتے ؟ اس میں پچاس کلمے ہیں اور ہر کلمہ میں ستر برکات ہیں۔
روایت میں ایک راوی مجالد بن سعید ہے، امام احمد (رح) فرماتے ہیں، لیس بشیء، ان کا کچھ اعتبار نہیں۔ اور کئی ایک محدثین نے کہا ہے یہ ضعیف ہے۔