4142: (مراسیل سعید (رح) بن المسیب) حضرت سعید بن السمیب (رح) (مشہور عبادت گذار ثقہ تابعی) فرماتے ہیں نبی کریم (صلی اللہ علیہ وآلہ وسلم) کا حضرت ابوبکر پر گذر ہوا وہ نماز پڑھ رہے تھے اور پست آواز میں قراءت کر رہے تھے حضرت عمر پر گذر ہوا تو وہ بلند اواز میں قراءت کر رہے تھے اور حضرت بلال (رض) کے پاس سے گذرے تو وہ ملا جلا کر قرآن پڑھ رہے تھے۔ صبح ہوئی تو سب آپ (صلی اللہ علیہ وآلہ وسلم) کے گرد جمع ہوئے۔ آپ (صلی اللہ علیہ وآلہ وسلم) نے فرمایا : اے ابوبکر ! میں تمہارے پاس سے گزرا تھا تم پست آواز میں قرات کر رہے تھے۔ عرض کیا : جی ہاں۔ آپ پر میرے ماں باپ قربان ہوں۔ میں اس کو سنا رہا تھا جس سے میں سرگوشی کرتا ہوں۔ آپ نے فرمایا : تھوڑی سی آواز بلند رکھا کرو۔ پھر آپ نے فرمایا : اے عمر میں تمہارے پاس سے گذرا تھا تم تیز آواز کے ساتھ قرآن پڑھ رہے تھے ؟ عرض کیا : جی ہاں میرے ماں باپ آپ پر قربان ہوں۔ میں رحمن کو سنا رہا تھا، شیطان کو بھگا رہا تھا اور اونگھتے ہوئے لوگوں کو جگا رہا تھا۔ آپ نے فرمایا : کچھ آواز پست رکھا کرو۔ پھر فرمایا : اے بلال میں تمہارے پاس سے گذرا تم کبھی اس سورت سے اور کبھی اس سورت سے پڑھ رہے تھے ؟ عرض کیا جی ہاں آپ پر میرے ماں باپ قربان ہوں میں اچھے کو اچھے کے ساتھ ملا رہا تھا۔ آپ نے فرمایا : ہر سورة کو اسی طرح پڑھو۔ مصنف عبدالرزاق۔
فائدہ : ۔۔ مراسیل سے مراد وہ احادیث ہیں جن کو تابعی صحابہ کے واسطے چھوڑ کر نبی سے روایت منسوب کرتا ہے۔