4167: ابراہیم تیمی (رح) سے مروی ہے کہ حضرت عمر (رض) ایک مرتبہ بالکل تنہا تھے، چنانچہ آپ (رض) اپنے جی میں کچھ سوچنے لگے۔ پھر حضرت ابن عباس (رض) کو بلایا اور فرمایا : یہ امت کیسے منتشر ہوسکتی ہے جب کہ ان کی کتاب ایک ہے، نبی ایک ہے اور قبلہ بھی ایک ہے۔ حضرت ابن عباس (رض) نے عرض کیا : یا امیر المومنین ہم پر قرآن نازل ہوا ہم نے اس کو پڑھا اور سمجھ لیا کہ کس بارے میں نازل ہوا ہے۔
اب ہمارے بعد ایسی قوم آئے گی جو قرآن پڑھے گی لیکن اس کو یہ معلوم نہ ہوگا کہ کس بارے میں نازل ہوا ہے۔ چنانچہ ہر قوسم کی الگ رائے ہوگی تو ان میں اختلاف پیدا ہوگا یہ سن کر حضرت عمر (رض) نے ان کو جھڑکا اور ڈانٹ دیا۔ چنانچہ حضرت ابن عباس (رض) لوٹ گئے۔ (پھر بعد میں بلایا اور ان کی بات کو صحیح سمجھا پھر فرمایا : اپنی بات دہراؤ (السنن لسعید، شعب الایمان للبیہقی، الجامع للخطیب)
فائدہ : اللہ پاک ہمیں اپنی رائے سے کلام اللہ میں لاف زنی کرنے سے بچائے۔
حضرت ابن عباس (رض) دور عمر (رض) میں نوعمر لڑکے تھے لیکن حضرت عمر (رض) کو ان کے علم پر اعتماد تھا۔ اسی وجہ سے بھری محفل میں جہاں بڑے بڑے اکابر صحابہ ہوتے تھے وہاں بھی آپ (رض) ان کو بلاتے اور ان کی رائے کو اہمیت دیتے تھے۔
اسی وجہ سے جب آپ کے دل میں یہ سوال پیدا ہوا تو ان کو بلایا اور بالآخر اس کو درست قرار دیا۔