٤١٧٨٤۔۔۔ خزیمہ بن جزء سے روایت ہے فرمایا : میں نے رسول اللہ (صلی اللہ علیہ وآلہ وسلم) سے زمین (پربسنے والے جانور) کی اجناس کے بارے میں پوچھا آپ نے فرمایا : جو چاہو پوچھو، میں نے عرض کی یارسول اللہ ! مجھے گوہ کے بارے میں بتائیں آپ نے فرمایا : نہ میں اسے کھاتا ہوں اور نہ اس سے منع کرتا ہوں مجھ سے یہ بیان کیا گیا کہ بنی اسرائیل کا ایک گروہ مسخ کردیا گیا اور اسے زمین کے چوپائے بنادیا گیا۔ میں نے عرض کی : خرگوش ؟ آپ نے فرمایا : نہ میں اسے کھاتا ہوں کیونکہ اس وقت آپ کا روزہ تھا اور نہ اس سے منع کرتا ہوں مجھے یہ پتہ چلا ہے کہ اسے خون حیض آتا ہے۔ میں نے عرض کی لومڑی ؟ آپ نے فرمایا : بھلالومڑی بھی کوئی کھاتا ہے ؟ میں نے عرض کی بجو ؟ آپ نے فرمایا : بجو بھی کوئی کھاتا ہے ؟ میں نے عرض کی : بھیڑیا ؟ آپ نے فرمایا : بھلابھیڑ یا بھی کوئی کھایا کرتا ہے جس میں کوئی خیرہو ؟ الحسن بن سفیان و ابونعیم