4180: اسحاق بن بشر القریشی کہتے ہیں ہمیں ابن اسحاق نے خبر دی ہے کہ ایک شخص حضرت عمر بن خطاب (رض) کے پاس آیا۔ اور عرض کیا النازعات غرقا (جو ڈوب کر کھینچنے والے ہیں) کی حقیقت کے بارے میں سوال کیا۔ حضرت عمر (رض) نے پوچھا : تم کون ہو ؟ جواب دیا میں اہل بصرہ میں سے قبیلہ بنی تمیم کی شاخ بنی سعد سے تعلق رکھتا ہوں۔ حضرت عمر نے فرمایا : تم ظالم قوم میں سے ہو۔ تم کو تمہارے عامل (گورنر) کے پاس روانہ کرتا ہوں وہ تمہیں سزا دے گا۔ پھر آپ نے چھڑی کے ساتھ اس کی ٹوپی اتار کر دیکھا کہ بڑے بڑے بال ہیں۔ پھر فرمایا : خدانخواستہ اگر تم گنجے سر والے ہوتے تو میں کچھ نہ پوچھتا (اور تمہاری گردن مار دیتا) پھر آپ (رض) نے حضرت ابو موسیٰ اشعری (رض) (گورنر) بصرہ کو لکھا کہ اصبغ بن علیم تمیمی ان چیزوں کے تکلفات میں پڑگیا ہے جن کی اس کو ضرورت نہیں اور جس کا اس کو حکم دیا گیا تھا اس چیز کو اس نے ضائع کردیا ہے۔ میرا یہ خط تم کو ملے تو اس کے ساتھ خریدو فروخت نہ کرنا، مریض ہوجائے تو اس کی عیادت نہ کرنا اور مرجائے تو اس کے جنازے میں حاضر نہ ہونا۔
پھر آپ (رض) اہل مجلس کی طرف متوجہ ہوئے اور فرمایا : اللہ عزوجل نے تم کو پیدا کیا ہے اور وہ تمہارے ضعف اور تمہاری کمزوری کو خوب جانتا ہے، چنانچہ اس نے تم میں سے اپنا ایک رسول بھیجا اور (اس کے توسط) تم پر کتاب نازل کی، اس میں تمہارے لیے کچھ حدود مقرر فرمائیں اور تم کو حکم دیا کہ ان حدود سے ہرگز تجاوز نہ کرنا، کچھ فرائض مقرر کیے اور ان کی اتباع کا حکم دیا اور کچھ محرمات رکھے اور تم کو ان ارتکاب سے منع کیا اور کچھ چیزوں کو چھوڑ دیا ان کو بھولے سے ہرگز نہیں چھوڑا، پس تم ان کے تکلفات میں نہ پڑو، ان کو تم پر رحمت کرتے ہوئے چھوڑا ہے۔
راوی کہتے ہیں : چنانچہ اصبغ بن علیم کہتا تھا : میں بصرہ آیا اور پچیس دن وہاں ٹھہرا اور (لوگ مجھ سے اس قدر متنفر ہوگئے کہ) مجھے کسی سے مل جانے سے مرجانا اچھا لگتا تھا۔ آخر اللہ نے اصبغ کے دل میں توبہ کا خیال پیدا کیا۔ چنانچہ اصبغ کہتے ہیں : میں ابو موسیٰ اشعری کے پاس آیا۔ آپ (رض) منبر پر تھے میں نے ان کو سلام کیا تو انھوں نے مجھ سے منہ پھیرلیا۔ میں نے عرض کیا : اے منہ پھیرنے والے ! میری توبہ اس ذات نے قبول کرلی جو تجھ سے اور عمر سے بھی بہتر ہے۔ پس میں اللہ عزوجل سے اپنے ان گناہوں کی توبہ کرتا ہوں جن کے ساتھ میں نے امیر المومنین عمر (رض) اور مسلمانوں کو ناراض کر رکھا تھا۔
حضرت ابو موسیٰ (رض) نے یہ بات حضرت عمر (رض) کو لکھ بھیجی تو حضرت عمر (رض) نے جواب بھیجا اس نے سچ کہا لہٰذا تم اپنے بھائی کے ساتھ (اچھا) معاملہ کرو۔ نصر فی الحجۃ۔