٤١٩٨٥۔۔۔ (مسندعلی) علی بن اعبد سے روایت ہے فرمایا : مجھے علی (رض) نے کہا : کیا میں تمہیں اپنا اور فاطمۃ بنت رسول اللہ (صلی اللہ علیہ وآلہ وسلم) کا واقعہ نہ سناؤں وہ گھروالوں میں سے سب سے زیادہ محبوب تھیں میں نے کہا : کیوں نہیں آپ نے فرمایا : چکی چلاتے ان کے ہاتھ آبلہ زدہ ہوگئے اور مشکیزہ اٹھاتے اٹھاتے ان کے جسم پر نشان پڑگئے ہانڈی تلے آگ سلگاتے ان کے کپڑے سیاہ ہوگئے اور انھیں نقصان بھی پہنچا ادھر نبی (صلی اللہ علیہ وآلہ وسلم) کے پاس خادم آئے میں نے کہا : اگر اباحضور کے پاس جائیں تو ایک خادم مانگ لائیں چنانچہ وہ گئیں تو آپ کے پاس کچھ لوگ باتیں کررہے تھے تو وہ واپس آگئیں۔ پھر اگلے دن ان کے پاس گئیں تو آپ نے فرمایا : کیا ضرورت ہے تو وہ خاموش ہوگئیں میں نے کہا : یارسول اللہ ! میں آپ کو بتاتاہوں چکی چلاتے اور مشکیز ہ اٹھاتے ان کے ہاتھوں میں چھالے اور جسم پر نشان پڑگئے ہیں جب آپ کے پاس خادم آئے تو میں ان سے آپ کے پاس چلنے کو کہا کہ آپ سے خادم مانگ لیں جو انھیں اس مشقت سے بچائے جس میں وہ مبتلا ہیں آپ نے فرمایا : فاطمہ ! اللہ تعالیٰ سے ڈرو اپنے رب کا فرض اداکرو اور اپنے گھروالوں کا کام کروجب تم اپنے بسترپرآؤ تو تینتیس بار سبحان اللہ تینتیس بار الحمد للہ اور چونتیس بار اللہ اکبر کہہ لیا کرو یہ سو کلمات کی مقدار تمہارے لیے خادم سے بہتر ہے تو انھوں نے کہا : میں اللہ تعالیٰ اور اس کے رسول سے راضی ہوں اور اپ نے انھیں خادم نہیں دیا۔ ابوداؤد عبداللہ بن امام احمد فی زوائدہ والعسکری فی المواعظ، حلیۃ الاولیائ، قال ابن المدینی، علی بن اعبدلیس بمعروف ولا اعرف لہ غیرھذا، وقال فی المغنی : علی بن اعبد عن لایعرف، کلام۔۔۔ ضعیف ابی داؤدا ٦٤، ٦٤٢۔