4222: (مسند عمر (رض)) شعبی (رح) سے مروی ہے ، وہ فرماتے ہیں : جب حضرت عمر (رض) مقام روجاء میں اترے تو وہاں لوگوں کو دیکھا کہ وہاں پڑے ہوئے پتھروں کی طرف بھاگ بھاگ کر جا رہے ہیں۔ آپ (رض) نے پوچھا : یہ کیا ہے ؟ لوگوں نے کہا : نبی اکرم (صلی اللہ علیہ وآلہ وسلم) نے ان پتھروں پر نماز پڑھی تھی۔ حضرت عمر (رض) نے فرمایا : سبحان اللہ ! رسول اللہ (صلی اللہ علیہ وآلہ وسلم) سفر میں گذرتے ہوئے سوار ہی رہے تھے۔ ایک وادی سے گذرے تو نماز کا وقت ہوگیا آپ نے وہاں نماز پڑھ لی اور بس پھر آپ (رض) نے فرمایا : میں یہود کے پاس ان کے وعظ کے دن جاتا رہتا تھا۔ ایک مرتبہ وہ کہنے لگے تمہارے ساتھیوں میں سے تم ہمارے ہاں سب سے زیادہ با عزت ہو۔ کیونکہ تم ہمارے پاس آتے ہو۔ حضرت عمر (رض) فرماتے ہیں : میں نے کہا : وہ تو میں صرف اس لیے تمہارے پاس آجاتا ہوں کہ میں اللہ کی کتابوں پر تعجب کرتا ہوں کہ وہ اس طرح ایک دوسرے کی تصدیق کرتی ہیں تو رات قرآن کی تصدیق کرتی ہے اور قران توراۃ کی۔
چنانچہ اسی طرح میں ایک دن یہودیوں کے ساتھ بات چیت کررہا تھا کہ حضور (صلی اللہ علیہ وآلہ وسلم) ہمارے قریب سے گذرے۔ پھر میں نے یہودیوں کو اللہ کی قسم دے کر پوچھا کہ تم اپنی کتاب میں کیا پڑھتے ہو کہ یہ اللہ کے رسول ہیں یا نہیں ؟ یہودیوں نے کہا : ہاں وہ اللہ کے رسول ہیں۔ میں نے ان کو کہا : اللہ کی قسم تم تو ہلاک ہوگئے۔ تم جاننے بوجھنے کے باوجود کہ وہ اللہ کے رسول ہیں ان کی اتباع نہیں کرتے۔ یہودیوں نے کہا : ہم کیوں ہلاک ہوں۔ ہم نے ان سے پوچھا تھا کہ تمہارے پاس وحی کون سا فرشتہ لے کر آتا ہے تو انھوں (یعنی آپ علیہ السلام) نے فرمایا : جبرائیل (علیہ السلام) ۔ تو وہ ہمارے دشمن فرشتے ہیں کیونکہ وہ سختی و ہلاکت کے فرشتے ہیں۔ حضرت عمر (رض) نے پوچھا : اچھا تمہارے نزدیک کون سا فرشتہ اچھا ہے ؟ یہود نے جواب دیا میکائیل (علیہ السلام) جو رحمت اور بارش وغیرہ لے کر آتے ہیں۔ حضرت عمر فرماتے ہیں : میں نے ان سے پوچھا : اچھا ان دونوں کا ان کے رب کے ہاں کیا مقام ہے۔ کہنے لگے : ایک خط کے دائیں جانب رہتا ہے اور دوسرا بائیں جانب۔ میں نے کہا : جبرائیل (علیہ السلام) کو یہ ہرگز روا نہیں ہے کہ وہ میکائیل (علیہ السلام) سے دشمنی رکھیں اور نہ میکائیل (علیہ السلام) کے لیے حلال ہے کہ وہ جبرائیل (علیہ السلام) کے دشمن سے دوستی رکھیں۔ اور میں گواہی دیتا ہوں کہ وہ دونوں فرشتے اور ان کے پروردگار سلامتی والے ہیں ان کے لیے جو ان سے محبت رکھتے ہیں اور ان کے لیے دشمن ہیں جو ان سے دشمنی رکھیں۔
حضرت عمر (رض) فرماتے ہیں : اس کے بعد میں حضور اکرم (صلی اللہ علیہ وآلہ وسلم) کی خدمت میں حاض رہوا میرا ارادہ تھا کہ جو کچھ میں نے یہودیوں سے بات چیت کی ہے اس کی خبر آپ (صلی اللہ علیہ وآلہ وسلم) کو دوں۔ لیکن آپ (صلی اللہ علیہ وآلہ وسلم) نے پہلے ہی فرمایا : کیا میں تم کو وہ آیت نہ سناؤں جو ابھی ابھی نازل ہوئی ہے ؟ میں نے عرض کیا : ضرور ! یا رسول اللہ۔ چنانچہ آپ نے یہ آیت تلاوت فرمائی :
من کان عدوا للہ وملائکتہ ورسولہ و جبرائیل ومیکل فان اللہ عدو للکافرین۔
جو شخص خدا اور اس کے فرشتوں کا اور اس کے پیغمبروں کا اور جبرائیل اور میکائیل کا دشمن ہو تو ایسے کافروں کا خدا دشمن ہے۔ حضرت عمر (رض) نے عرض کیا : یا رسول اللہ میں یہود کے پاس سے صرف اس لیے اٹھا تھا تاکہ آپ کو اس بات کی خبر دوں جو میری ان کی ایک دوسرے کے ساتھ ہوئی ۔ لیکن یہاں آ کر پتہ چلا کہ اللہ پاک مجھ سے سبت لے گئے ہیںَ
راوی کہتے ہیں پھر حضرت عمر (رض) نے ہم کو فرمایا : اسی وجہ سے میں اللہ کے دین میں پتھر سے زیادہ سخت ہوں۔ (کہ اللہ کا دین حرف بحرف حق اور سچ ہے) ۔ السنن للبیہقی، ابن راہویہ ، ابن جریر ابن ابی حاتم۔
کلام : اس روایت کی سند صحیح ہے۔ لیکن امام شعبی (رح) نے حضرت عمر (رض) کو نہیں پایا۔ مگر سفیان بن عیینہ نے اپنی تفسیر میں اس روایت کو حضرت عکرمہ (رح) سے روایت کیا ہے نیز اس روایت کے اور بھی کئی طرق ہیں جو مراسیل میں آئیں گے۔