4271: ابن لبیبہ (رح) سے مروی ہے کہ میں حضرت ابوہریرہ (رض) کی خدمت میں حاضر ہوا اور میں نے عرض کیا : مجھے ایسی چیز کے بارے میں بتائیے تمام امور جس کے تابع ہیں یعنی نماز کے متعلق جس کے بغیر ہمارا چارہ نہیں۔
حضرت ابوہریرہ (رض) نے فرمایا : کیا تم کچھ قرآن پڑھے ہوئے ہو ؟ میں نے عرض کیا جی ہاں ! انھوں نے پڑھنے کا حکم دیا تو میں نے سورة الفاتحہ پڑھ کر سنائی تو آپ (رض) نے فرمایا :
یہ سبع مثانی ہے، جس کے بارے میں اللہ کا فرمان ہے :
ولقد اتیناک سبعا من المثانی والقرآن العظیم۔
اور ہم نے آپ کو سات بار بار پڑھی جانے والی آیات اور قرآن عظیم عطا کیا۔ پھر آپ (رض) نے مجھ سے پوچھا : کیا تم نے سورة المائدہ پڑھ رکھی ہے ؟ میں نے اثبات میں جواب دیا تھا آپ (رض) نے فرمایا : اچھا تم آیت الوضوء پڑھو۔ میں نے وہ بھی پڑھ کر سنا دیں تو حضرت ابوہریرہ (رض) نے فرمایا۔ میرا خیال ہے کہ تم نماز کے لیے وضوء بھی سمجھ گئے ہوگے۔ پھر آپ (رض) نے فرمایا : تم نے اللہ کا یہ فرمان سنا ہے۔
اقم الصلوۃ لدلوک الشمس۔
نماز قائم کرو سورج ڈھلنے کے وقت۔
جانتے ہو دلوک سے کیا مراد ہے ؟ میں نے عرض کیا : نصف النہار کے بعد جب آفتاب آسمان کے پیٹ یا جگر سے ڈھل جائے۔ فرمایا : ہاں اس وقت تم ظہر کی نماز پڑھو۔ اور پھر جب سورج سفید ہی ہو۔ تو اس وقت عصر کی نماز پڑھو۔ جب تم کو ایسا لگے کہ تم سورج کو چھو سکتے ہو (یعنی جب کچھ ٹھنڈا ہوجائے اور اس پر نظر ڈالنا ممکن ہو) پھر فرمایا :
جانتے وہ غسق اللیل کیا ہے ؟ میں نے عرض کیا : جی ہاں، غروب شمس مراد ہے۔ فرمایا : ہاں پس تم اس کے پیچھے رہو (اور مغرب پڑھ لو) اور جب شفق (روشنی) غائب ہوجائے تو عشاء کی نماز پڑھ لو۔ پھر مشرق کی جانب اشارہ کرتے ہوئے فرمایا : جب رات یہاں سے ایک تہائی رات آجائے اس وقت (عشاء کا وقت ہے) لیکن اگر افق کی سفیدی جانے کے بعد ہی (عشاء ) پڑھ لو تو زیادہ افضل ہے۔ اور جب فجر طلوع ہوجائے تو فجر کی نماز پڑھ لو۔ جانتے ہو فجر کیا ہے ؟ میں نے اثبات میں جواب دیا تو آپ نے فرمایا : تمام لوگ اس کو نہیں جانتے۔ میں نے عرض کیا : وہی فجر ہے نا جب افق سفیدی کے ساتھ چمک اٹھے۔ فرمایا : ہاں اس وقت سے لے کر صبح کی سفیدی تک نماز پڑھ لو۔ پھر سفیدی تک پھر سفیدی تک۔ اور دیکھو رکوع و سجدہ یوں نہ کرو۔ کہ جس طرح پرندہ پانی پی کر اڑ جاتا ہے یا کتا اکڑوں بیٹھتا ہے (بلکہ رکوع و سجدہ کو اچھی طرح ادا کرو) اور بھول (اور غفلت) سے حفاظت میں رہو۔ حتی کہ تم نماز پڑھ لو۔
ابن لبیبہ کہتے ہیں : پھر میں نے ان سے عرض کیا : مجھے الصلاۃ الوسطی (درمیانی نماز) کے بارے میں بتائیے (کون سی ہے ؟ ) فرمایا : تم نے اللہ کا یہ فرمان نہیں سنا :
اقم الصلوۃ لدلوک الشمس الی غسق اللیل و قرآن الفجر۔
نماز قائم کرو سورج ڈھلنے سے رات چھانے تک اور فجر کا قرآن پڑھنا (یاد رکھو) (اس میں پانچوں نمازیں آگئیں)
اور فرمایا :
ومن بعد صلوۃ العشاء ثلث عورات لکم۔
اور عشاء کی نماز کے بعد تمہارے لیے تین تاریکیاں (حصے ہیں) ۔
یوں پانچوں نمازیں ان آیات میں آگئیں۔ پھر فرمایا :
حافظوا علی الصلوات والصلوۃ الوسطی۔
نمازوں پر محافظت کرو خصوصا درمیانی نماز پر۔
پس آگاہ رہو وہ عصر کی نماز ہے عصر کی نماز ہے۔ الجامع لعبد الرزاق۔
کیونکہ درمیان میں وہی ہے دو نمازیں اس سے قبل اور دو اس کے بعد ہیں۔