٤٢٩١٢۔۔ حضرت عائشہ سے روایت ہے کہ جب جعفر بن ابی طالب زید بن حارثہ ، اور عبداللہ بن رواحہ (رض) کی شہادت کی خبر آئی تو رسول اللہ خاموشی سے بیٹھ گئے اور آپ کے چہرے پر غم کے آثار نظر آرہے تھے میں دروازے کے پھٹن سے آپ کو دیکھ رہی تھی اتنے میں ایک شخص آکر آپ سے کہنے لگا، یارسول اللہ جعفر کے گھرانے کی خواتین پھر اس نے ان کے رونے کا ذکر کیا آپ نے فرمایا جاؤ انھیں خاموش کراؤ اگر وہ خاموش نہ ہوں تو ان کے چہروں پر مٹی ڈال دینا۔ رواہ ابن ابی شیبہ۔
بخاری کی روایت میں ہے کہ وہ شخص باربارآکر آپ سے یہی بات کہتا تومجبورا آپ نے کہا اگر وہ خاموش نہیں ہورہی ان کے مونہوں میں مٹی ڈال دو تاکہ وہ چپ ہوجائیں آپ کا منشا تھا کہ غم کی وجہ سے عورتیں رورہی ہیں تو ایک دفعہ منع کردینے سے اگر ان پر کوئی اثر نہیں ہواتوتمہارا حق پورا ہوگیا کہ تم نے روک دیابار بار اس بات کو دہرانا مناسب نہیں۔