٤٢٩٨١۔۔ حضرت عائشہ (رض) سے روایت ہے فرماتی ہیں ایک دن رسول اللہ نے اپنے صحابہ کرام سے فرمایا تم جانتے ہو کہ تم میں سے کسی کی اور اس کے مال اہل و عیال اور عمل کی کیا مثال ہے ؟ لوگوں نے عرض کیا : اللہ تعالیٰ اور اس کا رسول بہترجانتے ہیں فرمایا تم میں سے کسی کی اور اس کے مال اہل و عیال اور عمل کی مثال ایسے ہے جیسے کسی کے تین بھائی ہوں وفات کے وقت وہ اپنے تینوں بھائیوں کو بلائے اور کہے کہ میرے ساتھ جو کچھ پیش ہونے والا ہے تو دیکھ رہا ہے تیرے پاس میرے لیے اور تجھ سے میرے لیے کیا ہوسکتا ہے ؟ تو وہ کہہ دے تیرے لیے میرے پاس یہ ہے کہ میں تیری تیماردار کروں تجھ سے دور نہ ہوں تیرا کام جب تو مرجائے تجھے غسل وکفن دے کر اٹھانے والوں کے ساتھ تجھے اٹھالوں تجھے آرام سے اٹھاؤں گا اور تجھ سے تکلیف کو دور کردوں گا، جب دفنا کر واپس آؤں گا تو تیرے متعلق پوچھنے والوں کے سامنے تیری خوبیاں بیان کروں گا، تو یہ اس کا بھائی اہل و عیال ہوئے تو تمہارا کیا خیال ہے ؟ تو لوگوں نے عرض کیا یارسول اللہ ہم کوئی نفع نہیں سن رہے۔
پھر (آپ نے فرمایا) دوسرے بھائی سے کہتا ہے کیا تجھے میری مصیبت نظرآرہی ہے تو تیرے پاس میرے لیے اور تجھ سے میرے لیے کیا ہوسکتا ہے ؟ تو وہ کہے گا مجھ سے فائدہ تجھے صرف اس وقت تک ہے جب تک توزندوں میں رہے، جب تو مرجائے گا تو تجھے ایک طرف اور مجھے دوسری طرف لے جایا جائے گا تو یہ اس کا بھائی مال ہوا تو تمہاری کیا رائے ہے ؟ لوگوں نے عرض کیا یارسول اللہ ہمیں کوئی فائدہ سنائی نہیں دیتا پھر دوسرے (یعنی تیرے ) بھائی سے کہے گا تو دیکھ رہاے کہ مجھ پر کیا بن رہی ہے اور مجھے میرے اہل و عیال اور مال نے جو جواب دیا وہ بھی تم دیکھ رہے ہو تو میرے لیے تمہارے پاس اور میرے لیے کیا کچھ ہوسکتا ہے ؟ وہ کہے گا میں قبر میں تیرا ساتھی ہوں گا اور وحشت میں تیرا دل بہلاؤں گا اور وزن کے روز تیری (اعمال کی ) ترازو میں بیٹھوں گا تو یہ اس کا بھائی اس کا عمل ہوا تو تمہاری کیا رائے ہے ؟ لوگوں نے عرض کیا : یارسول اللہ بہترین بھائی اور بہترین دوست ہے آپ نے فرمایا حقیقت بھی یہی ہے۔
حضرت عائشہ (رض) فرماتی ہیں عبداللہ بن کرز آپ کی طرف اٹھے اور عرض کیا یارسول اللہ کیا آپ مجھے اجازت دیتے ہیں کہ میں اس کے متعلق اشعار کہوں، آپ نے فرمایا ہاں۔ چنانچہ وہ ایک رات گزار کر آئے اور رسول اللہ کے سامنے کھڑے ہو کرکہناشروع ہوئے اور لوگ جمع تھے۔
میں، میرے گھروالے اور میرے اعمال اس شخص کی طرح ہیں جو اپنے دوستوں کو اپنی طرف بلاکرکہہ رہاہو، اپنے بھائیوں سے جو تین ہوں آج جو مصیبت مجھ پر آئی اس میں میری مدد کرو، لمبافراق جس کا بھروسا نہیں تو میری اس پریشانی میں تمہارے پاس کیا ہے ؟ ان میں سے ایک شخص نے کہا : میں تیرا وہ دوست ہوں کہ (زندگی کے) زوال سے پہلے پہلے میں تمہاری فرمان برداری کرسکتا ہوں، جب (روح کی بدن سے) جدائی ثابت ہوجائے گی تو میں اس دوستی کو نبھا نہیں سکتا، جو ہمارے درمیان تھی سو اب جتناچاہو مجھ سے لے لو، کیونکہ مجھے کسی اور راستے چلادیا جائے گا اگر تو مجھے باقی رکھناچا ہے گا توتوباقی نہیں رہے گا، سو مجھ سے چھٹکارا پالے اور جلدی آنے والی موت سے پہلے نیکی کی تیزی کر۔
اور ایک شخص نے کہا : میں اسے بہت چاہتا تھا اور لوگوں میں فضیلت میں اسے دوسروں پر ترجیح دیتا تھا میرا فائدہ یہ ہے کہ میں کوشش کر والا اور تمہارا خیر خواہ ہوں جب موت کی مصیبت واقع ہوجائے گی تو میں لڑنے والا نہیں لیکن تجھ پر روؤں گا اور افسوس کروں گا اور جب تیرے متعلق کوئی پوچھے گا تو میں تعریف کروں گا۔ پیدل چلنے والوں کے ساتھ الوداع کرتے ہوئے میں بھی چلوں گا، اور ہر اٹھانے والے کے بعد نرمی سے مدد کروں گا تیرے اس گھر کی طرف جس میں تجھے داخل کیا جائے گا، اور جو میری مشغولی ہوگی میں اس پراناللہ واناالیہ راجعون، کہوں گا۔ گویا ہمارے درمیان دوستی تھی ہی نہیں اور نہ باہمی دادوہش کی اچھی محبت تھی تو یہ آدمی کے رشتہ دار اور ان کے فائدے ہیں اگرچہ وہ کتنے ہی حریص ہوں ان کا کوئی فائدہ نہیں۔ اور ان میں ایک شخص کہے گا، میں تیرا وہ بھائی ہوں جس جیساتوسخت مصیبت کے وقت بھی نہیں دیکھے گا تو مجھے غیر کے پاس ملے گا کہ میں بیٹھاہوں گا اور تیرے بارے میں جھگڑوں گا اور وزن کے روز میں اس پلڑے میں بیٹھوں گا جس میں میرا بیٹھنا (تیرے اعمال کے لیے ) بوجھ کا باعث ہوگا، لہٰذا مجھے نہ بھولنا اور میری جگہ تجھے معلوم ہونی چاہیے کیونکہ میں تجھ پر مہربان ، تیرا خواہ ہوں اور تجھے بےیارومددگار چھوڑوں گا نہیں یہ ہر وہ نیکی ہے جسے تو نے آگے بھیجا اگر تونی کی کرتا رہاتوباہمی ملاقات (یعنی قیامت کے روز) اس سے ملے گا۔ تو رسول اللہ اور مسلمان اس کی بات سے روپڑے عبداللہ بن کرز جب بھی مسلمانوں کی کسی جماعت پر گزرتے تو وہ آپکوبلاتے اور انھیں شعر سنانے کو کہتے جب آپ انھیں اشعار سناتے وہ روپڑتے۔ الرامھرمزی ، فی الامثال، وفیہ عبداللہ بن عبدالعزیز اللیثی ، عن محمد بن عبدالعزیز الزھری ضعفیان۔