4310:۔۔ ابن عمر (رض) حضرت ابوبکر (رض) سے روایت کرتے ہیں، حضرت ابوبکر (رض) فرماتے ہیں : میں رسول اکرم (صلی اللہ علیہ وآلہ وسلم) کے پاس تھا کہ یہ آیت نازل ہوئی :
من یعمل سوءا یجز بہ ولا یجد لہ من دون اللہ ولیا ولا نصیرا۔
جس نے برا عمل کیا اس کو اس کا بدلہ دیا جائے گا اور وہ اللہ سے بچانے والا کوئی ولی اور نہ کوئی مددگار پائے گا۔ رسول اللہ (صلی اللہ علیہ وآلہ وسلم) نے فرمایا : اے ابوبکر ! کیا میں ایک آیت نہ سناؤں جو ابھی مجھ پر نازل ہوئی ہے : میں نے عرض کیا : ضرور یا رسول اللہ ! چنانچہ رسول اللہ (صلی اللہ علیہ وآلہ وسلم) نے مذکورہ آیت پڑھ کر سنائی۔ حضرت ابوبکر (رض) فرماتے ہیں : یہ سن کر مجھے اس کے سوا کچھ محسوس نہ ہوا کہ میری کمر ٹوٹ رہی ہے، میں نے آپ (صلی اللہ علیہ وآلہ وسلم) سے اس کا ذکر کیا۔ آپ (صلی اللہ علیہ وآلہ وسلم) نے فرمایا : اے ابوبکر تمہیں کیا ہوا ؟ حضرت ابوبکر (رض) فرماتے ہیں : میں نے عرض کیا : یا رسول اللہ ! آپ پر میرے ماں باپ قربان ہوں، ہم میں سے کسی شخص سے برے عمل نہیں ہوتے ؟ تو کیا ہم کو ہمارے ہر عمل کی سزا ملے گی ؟ رسول اللہ (صلی اللہ علیہ وآلہ وسلم) نے فرمایا : اے ابوبکر ! تم کو اور مومنوں کو ان اعمال کا بدلہ دنیا ہی میں دے دیا جائے گا حتی کہ تم اللہ سے اس حال میں ملاقات کروگے کہ تمہارے سر پر کوئی گناہ نہ ہوگا اور دوسرے (کافر) لوگوں کے یہ بد اعمال اللہ پاک جمع کرتے رہتے ہیں اور قیامت کے دن ان کو ان اعمال کا بدلہ ملے گا۔ (عبد بن حمید، ترمذی، ابن المنذر)
کلام : امام ترمذی (رح) فرماتے ہیں : یہ حدیث ضعیف ہے۔ اس کی سند میں کلام ہے۔ موسیٰ بن عبیدہ کو حدیث میں ضعیف قرار دیا جاتا ہے، مولی بن سباع مجہول ہے، یہ حدیث اس سند کے علاوہ دوسری سندوں سے بھی ابوبکر (رض) سے مروی ہے لیکن اس کی سند صحیح نہیں۔