4315: ۔۔ محمد بن المنتشر سے مروی ہے کہ ایک شخص نے حضرت عمر بن خطاب (رض) کو کہا : میں کتاب اللہ کی سخت ترین آیت کو جانتا ہوں۔ حضرت عمر (رض) (مارے تعجب کے) اس کو مارنے کے لیے لپکے۔ اس شخص نے عرض کیا۔ آپ کو کیا ہوا ! میں نے اس آیت کے بارے میں کھود کرید کی تو معلوم کرلیا۔ راوی کہتے ہیں : اس کے بعد میں وہاں سے چلا آیا۔ جب اگلا دن ہوا تو حضرت عمر (رض) نے اسی شخص سے پوچھا : بتاؤ وہ کون سی آیت ہے جس کا تم گزشتہ روز ذکر کر رہے تھے ؟ اس شخص نے عرض کیا :
من یعمل سوءا یجز بہ۔
جس نے برا عمل کیا اس کو اس کا بدلہ ضرور دیا جائے گا۔ پھر اس شخص نے عرض کیا : پس ہم میں سے جو بھی برا عمل کرے گا اس کو اس کی سزا ضرور ملے گی۔ حضرت عمر (رض) نے فرمایا : جب یہ آیت نازل ہوئی تھی تو ہمارا یہ حال ہوگیا تھا کہ ہمیں نہ کھانا کچھ فائدہ دیتا تھا اور نہ پینا۔ حتی کہ اللہ پاک نے اس کے بعد یہ آیت نازل فرمائی اور نرمی پیدا کی :
و من یعمل سوءا او یظلم نفسہ ثم یستغفر اللہ یجد اللہ غفورا رحیما۔
جس نے برا عمل کیا یا اپنی جان پر کوئی عمل کیا پھر اللہ سے مغفرت مانگی تو وہ اللہ کو مغفرت کرنے والا (اور) مہربان پائے گا۔ (ابن راہویہ)