4322: ابن سمعانی ذیل میں فرماتے ہیں ہمیں ابوبکر ہبۃ اللہ بن الفرج، ابو القاسم یوسف بن محمد بن یوسف الخطیب، ابو القاسم عبد الرحمن بن عمرو بن تمیم مودب، علی بن ابراہیم بن علان، علی بن محمد بن علی، احمد بن الہیثم الطائی، حدثنا ابی عن ابیہ ، عن مسلم بن کہیل عن ابی صادق عن علی بن ابی طالب کی سند سے روایت پہنچی ہے۔
حضرت علی (رض) فرماتے ہیں : حضور اکرم (صلی اللہ علیہ وآلہ وسلم) کی وفات کے تین یوم بعد جب آپ کے جسم اطہر کو دفن کرچکے تو ایک دیہاتی آیا اور آتے ہی نبی اکرم (صلی اللہ علیہ وآلہ وسلم) کی قبر سے لپٹ گیا اور قبر کی مٹی اپنے سر پر ڈالنے لگا اور بولا : یا رسول اللہ ! آپ نے کہا، ہم نے سنا۔ آپ نے اللہ سے لیا، ہم نے آپ سے لیا اور یہ بھی اسی میں سے ہے جو اللہ نے آپ پہ نازل فرمایا :
ولو انہم اذ ظلموا انفسہم جاءوک فاستغفروا اللہ واستغفر لہم الرسول لوجدوا اللہ توابا رحیما۔۔ النساء : 64
اور یہ لوگ جب اپنے حق میں ظلم کر بیٹھتے تھے اگر تمہارے پاس آتے اور خدا سے بخشش مانگتے اور رسول خدا بھی ان کے لیے بخشش طلب کرتے تو خدا کو معاف کرنے والا (اور) مہربان پاتے۔ اور میں نے بھی اپنی جان پر ظلم کیا ہے اور آپ کے پاس اس لیے حاضر ہوا ہوں کہ آپ میرے لیے اللہ سے مغفرت مانگیں۔ چنانچہ قبر سے آواز آئی : تیری مغفرت کردی گئی۔
کلام : علامہ سیوطی (رح) فرماتے ہیں کہ " المغنی " میں الہیثم بن عدی الطائی کو متروک کیا گیا ہے۔ جس کی بناء پر روایت محل کلام ہے۔ (کنز العمال ج 2 ص 386)