4361: ۔۔ زید بن اسلم (رض) سے مروی ہے کہ رسول اکرم (صلی اللہ علیہ وآلہ وسلم) نے فرمایا :
میں اس شخص کو جانتا ہوں جس نے سب سے پہلے بحیرہ جانوروں کی رسم ڈالی۔ وہ بنی مدلج کا ایک شخص تھا اس کے پاس دو اونٹنیاں تھیں۔ اس نے دونوں اونٹنیوں کے کان کاٹ ڈالے اور ان کا دودھ پینا اور ان کا گوشت کھانا حرام قرار دے دیا۔ میں نے اس کو جہنم میں دیکھا کہ وہ دونوں اونٹنیاں اپنے کھروں کے ساتھ اس کو روندتی پھرتی ہیں اور اپنے مونہوں کے ساتھ اس کو کاٹتی پھرتی ہیں۔ اور میں اس شخص کو بھی جانتا ہوں جس نے سب سے پہلے سائبہ جانوروں کی رسم ڈالی، تیروں کے حصے مقرر کیے اور ابراہیم (علیہ السلام) کے عہد کو بگاڑ دیا وہ عمرو بن لحی ہے۔ میں نے اس کو جہنم میں دیکھا کہ وہ اپنی آنتیں کھینچتا پھرتا ہے۔ اور اس کی آنتوں کی وجہ سے اہل جہنم کو بھی بڑی تکلیف کا سامنا ہے۔ (عبدالرزاق ، مصعب بن ابن ابی شیبہ۔
فائدہ : ۔۔ فرمان الہی ہے :
ما جعل اللہ من بحیرۃ ولا سائبۃ ولا وصیلۃ ولا حام۔۔ المائدہ : 103 ۔
بحیرہ عرب کے مشرکین اونٹنی کے کان کاٹ کر چھوڑ دیتے تھے، یہ بتوں کی نذر ہوجاتی تھی اس کا دودھ پینا ممنوع ہوجاتا تھا سائبہ وہ جانور جو بتوں کے نام پر چھوڑ دیا جاتا۔ وصیلہ وہ اونٹنی جو مسلسل مادہ بچے جنے درمیان کوئی نر بچہ نہ ہو اسے بھی بتوں کے نام پر چھوڑ دیتے تھے۔ حام ایسا نر اونٹ جو خاص تعداد میں جفتی کرچکا ہو اس کو بھی بتوں کے نام پر چھوڑ دیتے تھے۔ یہ سب طریقے کفر و شرک تھے۔ کیونکہ خدا کی حلال کردہ چیز کو حرام ٹھہرانا کفر اور بتوں کی نذر کرنا شرک ہے۔