4373: ۔۔ حضرت عمر (رض) سے مروی ہے کہ (سرداران عرب میں سے) اقرع بن حابس تمیمی اور عیینہ بن حصن فزاری رسول اکرم (صلی اللہ علیہ وآلہ وسلم) کی خدمت میں آئے۔ انھوں نے دیکھا کہ آپ (صلی اللہ علیہ وآلہ وسلم) بلال ، عمار، صہیب، اور خباب بن ارت جیسے غریب صحابہ کے درمیان تشریف فرما ہیں انھوں نے ان غریب صحابہ کو دیکھ کر ناک بھوں چڑھائی۔ پھر آپ (صلی اللہ علیہ وآلہ وسلم) سے خلوت میں ملے اور بولے : ہم چاہتے ہیں کہ آپ ہمارے لیے ایک الگ مجلس بنا لیا کریں، جس سے غریب ہماری فضیلت کو جان لیں۔ کیونکہ عرب کے (وفود و قبائل) آپ کے پاس آتے رہتے ہیں تو ہم اس بات سے شرمندہ ہوتے ہیں کہ ہم کو غلام طرز کے لوگوں کے ساتھ بیٹھا دیکھیں۔ لہٰذا جب ہم آپ کے پاس حاضر ہوں تو ان لوگوں کو اپنے پاس سے اٹھا دیجیے۔ اور جب ہم فارغ ہو کر چلے جائیں تو چاہیں تو ان کے ساتھ بیٹھ جائیں۔ آپ (صلی اللہ علیہ وآلہ وسلم) (ان کے اسلام کی طرف مائل ہونے کے خیال سے) حامی بھر بیٹھے۔ انھوں نے کہا پھر آپ ہمارے لیے معاہدہ لکھوا دیں۔ چنانچہ آپ (صلی اللہ علیہ وآلہ وسلم) نے ایک صحیفہ منگویا تاکہ ان کو معاہدہ لکھوا دیں اور ساتھ میں حضرت علی (رض) کو بھی لکھنے کے لیے طلب کیا۔ صحابہ کہتے ہیں آپ نے اس کام کا ارادہ ہی کیا تھا اور ہم مسجد کے ایک کونے میں بیٹھے تھے کہ آپ (صلی اللہ علیہ وآلہ وسلم) پر جبرائیل (علیہ السلام) پر نازل ہوئے اور یہ آیت پڑھ کر سنائیں۔
ولا تطرد الذین یدعون ربہم بالغداۃ والعشی ۔۔ سے ۔۔۔ فتکون من الظالمین تک۔ سورة الانعام : 52 ۔
اور جو لوگ صبح و شام اپنے پروردگار سے دعا کرتے ہیں، اس کی ذات کے طالب ہیں ان کو (اپنے پاس سے) مت نکالو۔ ان کے حساب کی جواب دہی تم پر کچھ نہیں ۔ اور تمہارے حساب کی جواب دہی ان پر کچھ نہیں۔ اگر ان کو نکالوگے تو ظالموں میں سے ہوجاؤ گے۔ (مصنف ابن ابی شیبہ)