4381: ۔۔ حضرت علی (رض) سے مروی ہے کہ جب حضرت ہارون (علیہ السلام) کی وفات کا وقت قریب ہوا تو اللہ پاک نے حضرت موسیٰ (علیہ السلام) کو وحٰ کی کہ تو ہارون اور ان کے بیٹے کو لے کر (فلاں) پہاڑ کی غار میں چلا جا۔ ہم ہارون کی روح قبض کرنا چاہتے ہیں۔
چنانچہ موسیٰ (علیہ السلام) ، ہارون (علیہ السلام) اور ابن ہارون (رح) چل پڑے۔ جب غار تک پہنچ گئے اور اندر داخل ہوئے تو دیکھا کہ ایک چارپائی بچھی ہوئی ہے۔ حضرت موسیٰ (علیہ السلام) اس پر جا کر تھوڑی دیر کے لیے لیٹے پھر اٹھے اور فرمایا : اے ہارون واہ کتنی اچھی جگہ ہے یہ ! چنانچہ ہارون (علیہ السلام) اس چار پائی پر لیٹ گئے۔ لیٹے تو ان کی روح قبض کرلی گئی۔ چنانچہ موسیٰ اور ابن ہارون (علیہ السلام) رنجیدہ و غم زدہ اپنی قوم کے پاس واپس لوٹے۔ بنی اسرائیل نے حضرت موسیٰ (علیہ السلام) سے پوچھا : ہارون کہاں ہیں ؟ حضرت موسیٰ (علیہ السلام) نے فرمایا : وہ انتقال کرچکے ہیں۔ بنی اسرائیل بولے نہیں، بلکہ آپ نے ان کو قتل کردیا ہے۔ آپ جانتے تھے کہ ہم ان سے محبت رکھتے ہیں۔ حضرت موسیٰ (علیہ السلام) نے فرمایا : افسوس تم پر ! کیا میں اپنے بھائی کو قتل کروں گا۔ حالانکہ میں نے اللہ سے سوال کرکے ان کو اپنا وزیر بنوایا تھا اگر میں ان کو قتل کرتا تو ان کے بیٹے بھی میرے ساتھ تھے وہ مجھے ایسا کرنے دیدیتے ؟ بنی اسرائیل بولے : نہیں آپ ان سے حسد کرتے تھے ( کہ ان سے زیادہ محبت رکھتے ہیں) حضرت موسیٰ (علیہ السلام) نے فرمایا : اچھا تم ستر آدمی اپنے منتخب کرلو۔ چنانچہ حضرت موسیٰ (علیہ السلام) ان کو لے کر اسی غار کے لیے چل پڑے راستے میں دو آدمی بیمار پڑگئے۔ لوگوں نے ان کو چھوڑ دیا اور نشانی کے لیے کوئی نشان لگا دیا پھر موسیٰ (علیہ السلام) ، ابن ہارون اور بنی اسرائیل غار میں حضرت ہارون تک پہنچے۔ بنی اسرائیل کے لوگوں نے حضرت ہارون (علیہ السلام) سے پوچھا : اے ہارون آپ کو کس نے قتل کیا ؟ حضرت ہارون (حکم خدا سے) بول پڑے اور فرمایا : مجھے کسی نے قتل نہیں کیا بلکہ میں اپنی موت مرا ہوںَ
تب بنی اسرائیل کے ان منتخب افراد نے کہا اے موسیٰ ! تم کیا فیصلہ کرتے ہو ؟ بلکہ تم اپنے پروردگار سے دعا کرو کہ وہ ہم سب (ستر) افراد کو اپنا نبی بنا لے۔ ان کا یہ کہنا تھا کہ ان سب کو اور پیچھے رہ جانے والے دو آدمیوں کو بھی پکڑ لیا اور یہ سب بےہوش ہو کر گرپڑے۔
جبکہ موسیٰ (علیہ السلام) کھڑے ہو کر دعا کرنے لگے :
رب لو شئت اھلکتم من قبل و ایای اتھلکنا بما فعل السفہاء منا : 155 ۔
اے پروردگار ! اگر تو چاہتا تو ان کو اور مجھ کو پہلے ہی سے ہلاک کردیتا، کیا تو اس فعل جو ہم میں سے بیوقوفوں نے کیا ہے کی سزا میں ہمیں ہلاک کردے گا !
چنانچہ اللہ پاک نے ان کو زندہ کردیا پھر یہ اپنی قوم کی طرف انبیاء ہو کر لوٹے (عبد بن حمید، ابن ابی الدنیا فی کتاب من عاش بعد الموت، ابن جریر، ابن ابی حاتم، ابو الشیخ)