4407: ۔۔ سعید بن جبیر (رح) سے مروی ہے کہ ابو الصہباء نے حضرت علی بن ابی طالب (رض) سے حج اکبر کے بارے میں سوال کیا۔ اور اس کے ساتھ الصلاۃ الوسطی اور ادبار النجوم کے بارے میں بھی سوال کیا۔
حضرت علی (رض) نے فرمایا : ہاں ابو الصہباء ! حضور (صلی اللہ علیہ وآلہ وسلم) نے حضرت ابوبکر صدیق (رض) کو حجۃ الوداع سے پچھلے سال امیر حج بنا کر بھیجا تھا کہ وہ لوگوں کو حج کرائیں۔ انہی کے ساتھ مجھے بھی سورة برأت کی چالیس آیات دے کر بھیجا ہم (حج کی مصروفیات میں) چلتے رہے حتی کہ عرفہ کا دن آگیا۔ حضرت ابوبکر (رض) اپنی سواری پر کھڑے ہو کر لوگوں کو خطبہ دینے لگے۔ آپ (رض) نے حج کی ترغیب دی میقات حج کے احکام بتائے۔ پھر فرمایا : یا علی : اٹھ کھڑے ہو اور رسول اللہ (صلی اللہ علیہ وآلہ وسلم) کا پیغام لوگوں کو پڑھ کر سناؤ۔
حضرت علی (رض) فرماتے ہیں : میں نے اٹھ کر لوگوں کو سورة برأت کی چالیس آیات پڑھ کر سنائیں۔ پھر میں (میدان عرفہ سے فارغ ہو کر) منی گیا اور رمی جمار کی، اونٹ کی ربانی کی، سر منڈوایا اور پھر میں خیموں کے چکر کاٹ کاٹ کر ان کو مذکورہ آیات پڑھ پڑھ کر سناتا رہا۔ اس دن میں نے دیکھا کہ اہل جمعہ (مزدلفہ والے) سارے لوگ مسجد حرام میں جمع نہیں ہیں۔
پھر حضرت علی (رض) نے راوی ابو الصہباء کو فرمایا : اور تم نے مجھ سے ادبار النجوم کا سوال کیا وہ فجر کی دو (سنت) رکعت ہیں۔ اور تم نے صلوۃ الوسطی کے بارے میں سوال کیا وہ عصر کی نماز ہے، جس کے ساتھ حضرت سلیمان (علیہ السلام) کی آزمائش کی گئی۔ الدورقی۔
فائدہ : ۔۔ ادبار النجوم سے متعلق گزشتہ 4405 روایت کا فائدہ ملاحظہ کریں۔