4413: ۔۔ عبداللہ بن فضل ہاشمی سے مروی ہے وہ فرماتے ہیں کہ میں نے حضرت انس بن مالک (رض) کو فرماتے ہوئے سنا : حرہ (کی جنگ) میں میری قوم کو جو مصیبت پیش آئی اس پر مجھے بڑا رنج ہوا۔ حضرت زید بن ارقم (رض) عن کو یہ بات پہنچی تو انھوں نے مجھے خبر دی کہ انھوں نے رسول اکرم (صلی اللہ علیہ وآلہ وسلم) کو فرماتے ہوئے سنا ہے کہ : اے اللہ ! انصار کی مغفرت کر، انصار کی اولاد کی مغفرت کر اور انصار کی اولاد کی مغفرت کر۔
حضرت انس (رض) سے حاضرین نے پوچھا : یہ زید بن ارقم کون ہیں ؟ تو فرمایا : یہ وہ ہستی ہیں جس کے بارے میں رسول اللہ (صلی اللہ علیہ وآلہ وسلم) فرمایا کرتے تھے : اس شخص کی کوشش کے ساتھ اللہ نے (اپنا دین) پورا کردیا۔
ابن شہاب فرماتے ہیں ایک منافق شخص نے حضور (صلی اللہ علیہ وآلہ وسلم) کو خطبہ دیتے ہوئے سنا تو کہنے لگا : اگر یہ شخص سچا ہے تو ہم گدھے سے بھی بدتر انسان ہیں۔
حضرت زید بن ارقم (رض) نے (اس منافق کی بات سن لی اور) فرمایا : بیشک اللہ کی قسم یہ سچے ہیں اور تو گدھے سے زیادہ بدتر انسان ہے۔ پھر یہ بات حضور (صلی اللہ علیہ وآلہ وسلم) تک پہنچی تو منافق اپنی بات سے مکر گیا تب اللہ پاک نے رسول (صلی اللہ علیہ وآلہ وسلم) پر قرآن نازل کیا :
یحلفون باللہ ما قالوا ولقد قالوا کلمۃ الکفر بعد اسلامہ۔ توبہ : 74 ۔
یہ خدا کی قسمیں کھاتے ہیں انھوں نے (تو کچھ) نہیں کیا، حالانکہ انھوں نے کفر کا کلمہ کہا ہے اور یہ اسلام لانے کے بعد کافر ہوگئے ہیں۔
اور اللہ پاک نے یہ فرمان صرف حضرت زید بن ارقم (رض) کی سچائی کو ظاہر کرنے کے لیے نازل فرمایا تھا۔ (الدار قطنی فی الافراد، ابن عساکر)