44151” مسند حرملہ بن عبداللہ عنبری “ حیان بن عاصم کے دادا حرملہ ابو امامہ تھے انھیں ان کی دو دادیوں صفیہ بنت علبیہ اور دحیبیہ بن علیبہ نے حدیث سنائی کہ حرملہ بن عبداللہ نبی کریم (صلی اللہ علیہ وآلہ وسلم) کی خدمت میں حاضر ہوئے، حرملہ کہتے ہیں میں رسول اللہ (صلی اللہ علیہ وآلہ وسلم) کی خدمت میں حاضر ہوا تاکہ اپنے علم میں کچھ اضافہ کرلوں، چنانچہ میں آپ (صلی اللہ علیہ وآلہ وسلم) کے سامنے کھڑا ہوگیا پھر میں نے عرض کیا، یارسول اللہ آپ مجھے کس چیز کا حکم دیتے ہیں جو میں بجا لاؤں ؟ ارشاد فرمایا : اے حرملہ ! اچھا عمل کرو اور بری بات سے بچو، پھر میں چل پڑا اور اپنی اونٹنی کے پاس آگیا، پھر میں آپ (صلی اللہ علیہ وآلہ وسلم) کے پاس واپس لوٹا لگ بھگ پہلی جگہ یا اس کے قریب کھڑا ہوگیا میں نے عرض کیا : یارسول اللہ ! آپ مجھے کیا حکم دیتے ہیں ؟ ارشاد فرمایا : اے حرملہ ! اچھا عمل کرو اور برائی سے بچتے رہو، میں چل پڑا حتیٰ کہ اپنی اونٹنی کے پاس آگیا، میں پھر آپ (صلی اللہ علیہ وآلہ وسلم) کے پاس واپس لوٹا اور لگ بھگ پہلی جگہ یا اس کے قریب قریب کھڑا ہوگیا، میں نے عرض کیا : یارسول اللہ آپ مجھے کیا حکم دیتے ہیں ؟ فرمایا : اے حرملہ ! اچھا عمل کرو اور برائی سے بچتے رہو اور دیکھو کہ جب تمہارے کان ایسی بات سنیں جسے لوگ بھلائی کہتے ہیں جب تم ان کے پاس سے اٹھو تو اس بات کو بجا لاؤ اور دیکھو جس بات کو لوگ تمہارے لیے بری کہتے ہوں اور جب تم ان کے پاس سے اٹھو تو اس سے بچ جاؤ۔ حرملہ کہتے ہیں جب میں ان کے پاس سے اٹھا میں نے دیکھا کہ یہ دو حکم ہیں جنہیں ترک نہیں کیا جارہا یعنی بھلائی کا بجا لانا اور برائی سے اجتناب کرنا۔ رواہ ابن النجار