44154 شیخ جلال الدین سیوطی (رح) کہتے ہیں کہ میں نے شیخ شمس الدین بن قماح کے مجموعہ میں انہی کا لکھا ہوا پایا ہے کہ ابو العباس مستغفری کہتے ہیں : ایک مرتبہ میں نے طلب علم کے ارادہ سے مصر کا قصد کیا تاکہ وہاں امام ابوحامد مصری سے علمی استفادہ کروں اور ان سے حضرت خالد بن والید (رض) کی حدیث سنوں، چنانچہ آپ (رح) نے مجھے ایک سال روزے رکھنے کا حکم دیا، پھر اس کے بعد میں ان کے پاس واپس لوٹا چنانچہ آپ نے خالد بن ولید (رض) تک اپنے مختلف مشائخ کی سند حدیث سنائی کہ حضرت خالد بن ولید (رض) کہتے ہیں : نبی کریم (صلی اللہ علیہ وآلہ وسلم) کی خدمت میں ایک آدمی حاضر ہوا اور کہنے لگا : میں آپ سے دنیا اور آخرت کے متعلق سوال کرتا ہوں۔ فرمایا : جو کچھ پوچھنا چاہتے ہو پوچھو، وہ آدمی بولا میں لوگوں سے سب سے زیادہ صاحب علم بننا چاہتا ہوں ، آپ (صلی اللہ علیہ وآلہ وسلم) نے فرمایا : اللہ تعالیٰ سے ڈرتے رہو لوگوں میں سب سے زیادہ صاحب علم ہوجاؤ گے، اس نے عرض کیا : میں لوگوں میں سب سے زیادہ مالدار بننا چاہتا ہوں فرمایا : قناعت اختیار کرو لوگوں سے سب سے زیادہ مالدار ہوجاؤ گے۔ عرض کیا، میں لوگوں میں سب سے بہتر بننا چاہتا ہوں، حکم ہوا، لوگوں میں سب سے بہتر وہ ہے جو لوگوں کو نفع پہنچاتا ہو لہٰذا تم لوگوں کو نفع پہنچانے والے بن جاؤ، عرض کیا : میں چاہتا ہوں کہ لوگوں میں سب سے زیاہ عدل کرنے والا بن جاؤں، حکم ہوا کہ لوگوں کے لیے بھی وہی پسند کرو جو اپنے لیے پسند کرتے ہو، عرض کیا میں اللہ تعالیٰ کا خاص الخاص بندہ بننا چاہتا ہوں، فرمایا : اللہ تعالیٰ کا کثرت سے ذکر کرو اللہ تعالیٰ کے خاص بندے بن جاؤ گے۔ عرض کیا میں محسنین میں سے ہونا چاہتا ہوں، حکم ہوا : اللہ تعالیٰ کی اس طرح عبادل کرو گویا تم اسے دیکھ رہے ہو گو کہ تم اسے نہیں دیکھ سکتے لیکن وہ تو تمہیں دیکھتا ہے۔ عرض کیا میں چاہتا ہوں کہ میرا ایمان مکمل ہوجائے، حکم ہوا : اپنے اندر اخلاق حسنہ پیدا کرو ایمان مکمل ہوجائے گا۔ عرض کیا، میں اللہ تعالیٰ کے فرمان برداروں میں سے ہونا چاہتا ہوں، حکم ہوا اللہ تعالیٰ کے فرائض ادا کرو اس کے فرمان بردار بن جاؤ گے، عرض کیا : میں گناہوں سے پاک وصاف ہو کر اللہ تعالیٰ سے ملنا چاہتا ہوں۔ حکم ہوا پاک ہونے کے لیے جنابت سے غسل کیا کرو قیامت کے دن اللہ تعالیٰ سے ملاقات کرو گے کہ تمہارے اوپر کوئی گناہ نہیں ہوگا، عرض کیا، میں چاہتا ہوں کہ قیامت کے دن نور میں میرا حشر کیا جائے، حکم ہوا، ظلم مت کرو قیامت کے دن نور میں جمع کیے جاؤ گے ، عرض کیا، میں چاہتا ہوں کہ میرا رب مجھ پر رحم کرے، حکم ہوا، تم اپنے اوپر رحم کرو اور اللہ تعالیٰ کی مخلوق پر رحم کرو اللہ تعالیٰ تمہارے اوپر رحم کرے گا۔ عرض کیا : میں چاہتا ہوں کہ لوگوں میں زیادہ عزت و اکرام والا ہوں، حکم ہوا مخلوق سے اللہ تعالیٰ کی شکایت مت کرو لوگوں میں عزت والے ہوجاؤ گے۔ عرض کیا : میں چاہتا ہوں کہ میرے رزق میں وسعت پیدا ہو، فرمایا کہ طہارت پر ہمیشگی کرو تمہارے رزق میں وسعت کردی جائے گی۔ عرض کیا، میں اللہ اور اس کے رسول کا محبوب بننا چاہتا ہوں، حکم ہوا جس چیز کو اللہ اور اللہ کا رسول محبوب رکھتا ہو اسے تم بھی محبوب رکھو اور جسے اللہ اور اللہ کا رسول مبغوض سمجھتے ہوں اسے تم بھی مبغوض سمجھو ۔ عرض کیا میں چاہتا ہوں کہ اللہ کے غصہ سے محفوظ ہوجاؤں، فرمایا : کسی پر غصہ مت کرو اللہ تعالیٰ کے غصہ سے محفوظ ہوجاؤ گے ، عرض کیا میں چاہتا ہوں کہ میری دعا قبول کی جائے، فرمایا : حرام سے بچو تمہاری دعا قبول کی جائے گی، عرض کیا : میں چاہتا ہوں کہ اللہ تعالیٰ مجھے سرعام رسوانہ کرے ، فرمایا : اپنی شرمگاہ کی حفاظت کرو اللہ تعالیٰ تمہیں سرعام رسوا نہیں کرے گا عرض کیا : میں چاہتا ہوں کہ اللہ تعالیٰ میرے عیوب پر پردہ کرے، حکم ہوا : تم اپنے بھائیوں کے عیوب پر پردہ کرو اللہ تعالیٰ تمہیں سرعام رسوا نہیں کرے گا عرض کیا : کونسی چیز خطاؤں کو مٹا دیتی ہے، حکم ہوا آنسو، خضوع اور امراض، عرض کیا : کونسی نیکی اللہ تعالیٰ کے ہاں افضل ہے فرمایا : حسن اخلاق، تواضع، آزمائش کے وقت صبر اور رضا بالقضاء ، عرض کیا اللہ تعالیٰ کے ہاں سب سے بڑی برائی کونسی ہے۔ حکم ہوا بدخلقی اور بخل ، عرض کیا : کونسی چیز اللہ تعالیٰ کے غصہ کو مٹاتی ہے فرمایا : صدقہ پوشیدہ کرو اور صلہ رحمی کرو ، عرض کیا کونسی چیز دوزخ کی آگ کو بجھاتی ہے۔ حکم ہوا روزہ دوزخ کی آگ کو بجھاتا ہے۔