4418: ۔ ابن عباس (رض) سے مروی ہے کہ آپ (صلی اللہ علیہ وآلہ وسلم) کے طائف سے واپسی آنے کے چھ ماہ بعد آپ کو غزوہ تبوک کا حکم ملا۔ اسی کو اللہ تعالیٰ نے ساعۃ العسرۃ (تنگی کی گھڑی) فرمایا : یہ سخت گرمی کے زمانے میں پیش آیا۔ ان ایام میں نفاق (یعنی منافقین) کی بھی کثرت ہوگئی تھی اور اصحاب صفہ کی تعداد بھی زیادہ ہوگئی تھی۔ صفہ فاقہ کشوں کا گھر تھا۔ جس کا کوئی ٹھکانا نہ ہوتا وہ یہاں آجاتا تھا۔ ان کے پاس نبی (صلی اللہ علیہ وآلہ وسلم) اور دیگر مسلمانوں کا صدقہ آتا رہتا تھا۔ اور جب کوئی غزوہ پیش آتا تو مالدار مسلمان آتے اور ایک ایک صفہ کے ساتھی کو ساتھ لے جاتا۔ کوئی زیادہ کو بھی لے جاتا تھا۔ اور ان کو سامان جہاد فراہم کرتا۔ چنانچہ یوں فقراء مسلمین بھی غزوۃ میں امراء مسلمین کے شانہ بشانہ شریک ہوتے۔ اور امراء مسلمین کا مقصود سامان فراہم کرنے سے صرف اللہ کی رضاء مقصود ہوتی۔
چنانچہ حضور اکرم (صلی اللہ علیہ وآلہ وسلم) نے مسلمانوں کو ثواب کی غرض سے اللہ کی راہ میں خرچ کرنے کا حکم دیا۔ چنانچہ مسلمانوں نے اللہ کے ثواب کی خاطر اپنا اپنا مال پیش کیا۔ کچھ (منافق) لوگوں نے بغیر ثواب کی امید کے خرچ کیا۔ فقراء مسلمین کو مالدار مسلمانوں نے سواریاں دیں۔ کچھ لوگ پیچھے رہ گئے۔ سب سے افضل صدقہ جو کسی نے اس دن پیش کیا وہ حضرت عبدالرحمن بن عوف (رض) تھے۔ انھوں نے دو سو اوقیہ (چاندی) اللہ کی راہ میں صدقہ کی۔ حضرت عمر بن خطاب (رض) نے سو اوقیہ (چاندی) دی، حضرت عاصم انصاری نے کھجور کے نوے وسق صدقے میں دیے۔ حضرت عمر بن خطاب (رض) نے عرض کیا : یا رسول اللہ ! مجھے لگتا ہے شاید حضرت عبدالرحمن (رض) نے اپنے گھر والوں کے لیے پیچھے کچھ نہیں چھوڑا۔ لہٰذا آپ (رض) نے ان سے سولا کیا : کیا تم نے اپنے گھر والوں کے لیے بھی کچھ چھوڑا ہے ؟ انھوں نے عرض کیا : جو خرچ کیا ہے اس سے زیادہ اور اچھا پیچھے گھر والوں کے لیے چھوڑ دیا ہے۔ حضور (صلی اللہ علیہ وآلہ وسلم) نے پوچھا کتنا ؟ عرض کیا : اللہ اور اس کے رسول نے جو بھلائی اور خیر کا سچا وعدہ کیا ہے وہ ان کے لیے چھوڑ آیا ہوں۔ اسی طرح ایک انصاری شخص نے ایک صاع (ساڑھے تین سے کے برابر) کھجور صدقہ میں پیش کیں۔
منافقین نے مسلمانوں کو بڑھ چڑھ کر صدقات پیش کرتے دیکھا تو یہ کام شروع کیا کہ اگر کسی کو زیادہ مال صدقہ کرتے دیکھتے دیکھتے تو کہتے کہ یہ خود اس کا زیادہ محتاج ہے جو لے کر آیا ہے۔ چنانچہ انھوں نے جب ابو عقیل ایک صاع کھجور لے کر آئے اور عرض کیا : میں نے رات بھر مزدوری کرکے دو صاع کھجور اجرت کمائی تھی۔ اللہ کی قسم میرے پاس ان دو صاع کھجوروں کے سوا کچھ نہیں۔ اور وہ انتہائی معذر اور شرمندگی ظاہر کرنے لگے۔ پھر کہا چنانچہ میں ایک صاع یہاں صدقے کے لیے لے آیا اور ایک صاع پیچھے گھر والوں کے لیے چھوڑ آیا ہوں۔
چنانچہ منافقین نے ان پر آواز کسی کہ یہ تو خود اپنے صاع کا زیادہ محتاج ہے۔ جبکہ یہ منافقین غنی ہوں یا فقیر سب اس بات کی لالچ میں تھے کہ ان اموال صدقات میں سے بھی ان کو حصہ مل جائے۔
جب رسول اللہ (صلی اللہ علیہ وآلہ وسلم) کے نکلنے کا وقت قریب آیا تو یہی منافقین آگے ہو ہو کر اپنے گھروں کو واپس جانے کی اجازت مانگنے لگے۔ گرمی کی شدت کی شکایت کرتے اور غزوہ سے ڈر ڈر کر پیچھے رہ جاتے۔ لڑائی کی صورت میں موت کا فتنہ انھیں بزدل کررہا تھا۔ الغرض وہ اللہ کے نام کی جھوٹی قسمیں کھا کھا کر عذر اور بہانے تراشنے لگے۔ آخر رسول اللہ (صلی اللہ علیہ وآلہ وسلم) بھی اجازت دیتے رہے۔ چونکہ آپ (صلی اللہ علیہ وآلہ وسلم) کو ان کے دلوں کی باتوں کا علم نہ تھا۔
ان منافقین نے مل کر ایک مسجد نفاق بھی بنائی۔ ابو عامر فاسق ان کا بڑا بنا ۔ جو ہرقل کے ساتھ ملا ہوا تھا۔ اس کے ساتھ کنانہ بن عبدیالیل اور علقمہ بن علامہ عامری بھی تھے۔ انہی کے بارے میں سورة برأت نازل ہوئی جس میں کسی بیٹھنے والے کو جنگ سے پیچھے رہ جانے کی رخصت نہیں تھی۔ اور اس میں یہ حکم بھی نازل ہوا :
انفروا خفافا و ثقالا۔
ہلکے ہو یا بوجھل نکلو اللہ کی راہ میں۔
پھر جو سچے کمزور مسلمان تھے جن میں مریض اور فقیر بھی تھے انھوں نے رسول اللہ (صلی اللہ علیہ وآلہ وسلم) کو شکایت کی اور عرض کیا کہ یہ تو ایسا حکم ہے جس میں کچھ رخصت نہیں ہے۔ جبکہ منافقین کے گناہ (اور چالبازیاں) چھپے ہوئے تھے، جو بعد میں ظاہر ہوئے۔ بہرکیف پیچھے رہ جانے والوں میں بہت لوگ تھے اور ان کو کوئی عذر بھی نہ تھا اور سورة برأت رسول اللہ (صلی اللہ علیہ وآلہ وسلم) اور آپ کے ساتھ جانے والوں کی شان میں نازل ہوئی۔ حتی کہ آپ (صلی اللہ علیہ وآلہ وسلم) تبوک پہنچ گئے۔ وہاں پہنچ کر آپ (صلی اللہ علیہ وآلہ وسلم) نے علقمہ بن محرز مدلجی کو (لشکر دے کر) فلسطین بھیجا اور (دوسرا لشکر دے کر) حضرت خالد بن ولید (رض) کو دومۃ الجندل بھیجا۔ اور فرمایا : جلدی جاؤ۔ شاید تم اس کو باہر قضائے حاجت کرتا ہوا پاؤ اور اس کو پکڑ لو۔
چنانچہ حضرت خالد (رض) گئے اور فرمان رسول کے مطابق دشمن کو اسی حال میں پایا۔ اور اس کو پکڑ لیا۔
ادھر مدینہ میں موجود منافقین کوئی بری خبر (جو مسلمانوں کے لیے باعث خوشی ہوتی) سنتے تو لرز جاتے لیکن جب سنتے کہ مسلمان مشقت اور تنگی میں مبتلا ہیں تو خوش ہوتے اور کہتے تھے کہ ہم جانتے تھے ایسا ہوگا اسی لیے ہم محتاط رہے (اور نہیں گئے) اور جب مسلمانوں کی سلامتی اور مالداری کی خبر سنتے تو رنجیدہ ہوجاتے۔ اور مدینہ میں موجود ہر منافق کے چہرے سے ان کیفیات کا اندازہ ہوتا تھا۔ پس کوئی منافق نہ رہا جو خبیث عمل کے ساتھ اور خبیث رتبے کے ساتھ چھپتا نہ پھر رہا ہو۔ جبکہ ہر بیمار اور لاچار خوشحالی اور فراخی کا انتظار کررہا تھا جس کا اللہ نے وعدہ فرمایا تھا۔ ادھر سورة برأت بھی مسلسل موقع بموقع نازل ہو رہی تھی۔ (جس میں بہت سی خفیہ باتیں ظاہر ہورہی تھیں) جس کی وجہ سے مسلمان بھی مختلف گمانوں کا شکار تھے اور ڈر رہے تھے کہ کوئی بڑا بوڑھا جس سے کوئی گناہ سرزد ہوا ہو اور سورة توبہ اس کا پردہ فاش کردے اور وہ اسی کے صدمے میں نہ چلا جائے۔ الغرض سورة برأت میں ہر عمل کرنے والے کا متبہ ہدایت کا یا گمراہی کا آشکارا ہوگیا اور سورة برأت کا نزول بھی مکمل ہوگیا۔ (ابن عائذ، ابن عساکر)