4429:۔ عباد بن عبداللہ اسدی سے مروی ہے وہ کہتے ہیں میں حضرت علی (رض) کی خدمت میں موجود تھا آپ (رض) (پارک نما) کشادہ گھاس پر تشریف فرما تھے۔ ایک شخص آیا اور اس آیت کے بارے میں آپ (رض) سے سوال پوچھا :
افمن کان علی بینۃ من ربہ ویتلوہ شاہد منہ الخ۔ ھود : 17 ۔
بھلا جو اپنے پروردگار کی طرف سے دلیل رکھتے ہوں اور ان کے ساتھ ایک (آسمانی) گواہ بھی اس کی جانب سے ہو۔
کا کیا مطلب ہے ؟ آپ (رض) نے فرمایا : قریش کے جس شخص پر بھی استرا چلا ہو (یعنی ہر بالغ شخص) کے بارے میں کچھ نہ کچھ قرآن ضرور نازل ہوا ہے۔ اللہ کی قسم ! اللہ کی قسم ! اگر یہ لوگ جان لیں کہ ہم اہل بیت کے لیے اللہ نے محمد (صلی اللہ علیہ وآلہ وسلم) کی زبان پر کیا انعام گنوائے ہیں تو یہ مجھے اس سے کہیں زیادہ پسند ہے کہ یہ پوری جگہ مجھے سونے چاندی کے ساتھ بھر کر مل جائے۔
اللہ کی قسم ! اس امت میں ہماری مثال ایسی ہے جیسے نوح (علیہ السلام) کی قوم میں کشتی نوح۔ اور ہماری مثال اس امت میں ایسی ہے جیسی بنی اسرائیل میں باب حطۃ، (جس پر سے گذرنے والا اسرائیلی اپنی مراد کو پہنچا) ۔ ابو سہل القطان فی امالیہ، ابن مردویہ۔
فائدہ : ۔۔ یعنی قریش کا ہر شخص اس بات کو بخوبی جانتا ہے کہ محمد (صلی اللہ علیہ وآلہ وسلم) حق پر ہیں اور جو ہم اصحاب رسول کے ساتھ مل گیا وہ کشتی نوح کی طرح کامیاب ہے۔ لیکن پھر کافر لوگ نہیں مانتے۔